Вазири фарҳанг ва иттилооти ҳукумати қаблии Афғонистон Ҳорун Ҳакимӣ дар Амрико бо иттиҳоми таҷовузи ҷинсӣ боздошт шудааст.
Бино ба гузориши расонаҳои амрикоӣ, Ҳакимӣ рӯзи шанбе, 9-уми марти соли ҷорӣ дар шаҳри Принс-Уилями Вирҷиниёи Амрико дар пайи шикояти як зани 27-сола бо иттиҳоми дастдарозӣ ба ӯ дастгир шудааст.
Гуфта мешавад, ин зан пеш аз шикоят ба пулис бо Ҳорун Ҳакимӣ дар робита будааст. Бар асоси гузориши расонаҳо, зани 27-сола пеш аз ҳодиса дар хонаи собиқ вазири иттилооти Афғонистон зиндагӣ мекард ва шоми рӯзи ҷумъа ба пулис шикоят кардааст.
Ҳорун Ҳакимӣ моҳи майи соли 2021, чанд моҳе қабл аз суқути ҳукумати Ашраф Ғанӣ ба унвони сарпарасти Вазорати иттилоот ва фарҳанги Афғонистон муаррифӣ шуда буд.
Пас аз омадани Толибон ба сари қудрат дар моҳи августи соли 2021 сарпарастии ин вазоратро ҳоло мулло Хайруллоҳ Хайрхоҳ, ки соли 2002 дар Покистон боздошт ва 13 сол дар Гуантанамо зиндонӣ буд, бар уҳда дорад.
То ҳол назари худи Ҳорун Ҳакимӣ дар ин бора дастраси расонаҳо нагардидааст ва ҳамчунин ҳувият ва шаҳрванди кадом кишвар будани зани шикояткунанда низ маълум нест.
