Додситон барои чор гумонбар дар куштори Шуҳрат Исматуллоев, муовини аввали Ҳасан Асадуллозода раиси “Ориёнбонк” ҳабси якумрӣ хостааст.
Радиои Озодӣ дар истинод ба манобеаш менависад, ки додситон дар мурофиа додгоҳӣ барои Дилшод Саидмуродов, машҳур бо лақаби Дилшоди “СБ” ё “красавчик”, соҳибкор Қамарруззамон Азизов ва ду нафари дигар, ки аз онҳо ном бурда нашудааст, ҳабси абад, инчунин барои 10 нафари дигар аз 3 то 14 сол зиндон хостааст.
Бино ба иттилои манбаъ, на ҳамаи гумонбарон ба куштани Шуҳрат Исматуллоев муттаҳаманд. Нафароне, ки барояшон додситон ҳукми сабуктар талаб кардааст, нисбаташон барои хабар надодан ё пинҳон доштани ҷиноят парванда боз шуда будааст.
Гуфта мешавад, баъд аз талаби додситон, додрас ба хонаи машваратӣ рафтааст ва рӯзҳои наздик ҳукми додгоҳ нисбат ба 14 нафар содир мешавад.
Муҳокимаи муттаҳамон дар қатли Шуҳрат Исматуллоев, ки дар аввали моҳи январи соли ҷорӣ аз тарафи додраси Додгоҳи олӣ оғоз шуда буд, дар Боздоштгоҳи муваққатии шаҳри Душанбе (СИЗО) мегузарад.
Ёдовар мешавем, ки 23-уми июни соли 2023 хабари рабуда шудани муовини раиси “Ориёнбонк” Шуҳрат Исматуллоев расонаӣ шуд. Мақомот пас аз ҷустуҷӯи зиёд 12-уми август тавонистанд ҷасади Шуҳратро аз аз мавзеи Саразми Панҷакент пайдо кунанд.
Юсуф Раҳмон, додситони кулли Тоҷикистон, моҳи феврали соли ҷорӣ зимни нишасти матбуотӣ ба рӯзноманигорон гуфта буд, ки дар робита ба ин қазия нисбати 18 нафар парвандаи ҷиноятӣ кушодаанд ва ҳоло 14 нафарашон дар курсии айбдорӣ нишастаанд.
Инчунин ду нафари дигар дар кофтукоб ва ду нафари дигар (Рустам Ашӯров ва Парвиз Мустафоқулов) фавтидаанд.
