Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон бо нашри иттилоияе маблағи ҳаҷро барои соли ҷорӣ эълон кард.
Бино ба иттилои Кумитаи дин, имсол ҳар нафаре, ки ҳаҷ рафтан мехоҳад, бояд 57 ҳазор сомонӣ маблағ пардохт кунад. Ва таъкид шудааст, ки ин маблағ бояд ғайринақдӣ ва танҳо дар “Ориёнбонк”, бонки Ҳасан Асадуллозода, додараруси Эмомалӣ Раҳмон пардохт шавад.
Кумитаи дини Тоҷикистон мегӯяд, ин нархномаро, ки тамоми хароҷоти як ҳоҷиро аз рафтан то баргаштан ва масрафҳои сафар дар бар мегирад, дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон муайян кардааст.
Маблағи ҳаҷ дар ҳоле ба “Ориёнбон”-и Ҳасан Асадуллозода ворез мешавад, ки ширкати ҳавопаймоии берақиби ӯ – “Сомон Эйр” низ ҳамасола бо парвозҳои махсус ҳоҷиёнро аз Душанбе ба Ҷиддаи Арабистони Саудӣ мебарад.
Дар хабарномаи Кумитаи дин гуфта мешавад, оғози сафарҳо ба ҳаҷ аз нимаи дуюми мойи соли ҷорӣ шуруъ мешавад. Аммо дар робита ба раванди сабти ном кардани шаҳрвандон барои сафар ба ҳаҷ ва пардохти маблағҳои иловагӣ як манбаъ аз вилояти Хатлон ба Azda tv гуфт, ки миқдори маблағи ҳаҷ пеш аз эълони Кумитаи дин маълум буд, чун аз хеле боз сабти ном шуруъ шудааст ва дар бархе ноҳияҳои ин вилоят дигар ҷойи холӣ намондааст. “Агар хоҳед, ки шуморо ба рӯйхат ворид кунанд, бояд ба ғайр аз маблағи давлатӣ аз 1300 то 1700 доллар пули иловагӣ медиҳед, баъд аз он шуморо дар дигар ноҳияҳо номнавис мекунанд.”, мегӯяд манбаъ.
Ҳамчунин Кумитаи дини кишвар мегӯяд, “ҳеч шахс ва ҳеч ширкати сайёҳие салоҳият ва имконияти сафарбарнамоӣ ва таъмини шароити будубоши ҳаҷравандагонро надорад.” Ба гуфтаи ин ниҳод, бяод тамоми хоҳишмандони ҳаҷ танҳо ба воситаи онҳо сафар кунанд. Ин дар ҳолест, ки дар дигар кишварҳо ширкатҳои сийёҳӣ ҷудо аз давлат шаҳрвандонашонро ба ҳаҷ мебаранд.
Пас аз боз шудани роҳҳо бо кишвари ҳамсоя ва инчунин осон кардани дарёфти визаи умра аз ҷониби Арабистони Саудӣ аксари мардум бо дигар роҳҳо тариқи кишварҳои ҳамсоя ба ҳаҷ ва умра сафар мекунанд, ки ин кор даромади ширкатҳои наздик ба хонаводаи раисҷумҳурро, ки танҳо онҳо ба ин кор машғул буданд, кам кард.
