Дирӯз, 24-уми июл Хадамоти алоқаи назди Ҳукумати Ҷумҳурии Тоҷикистон нишасти матбуотӣ доир карда, масъалаи гаронии интернет ва заъиф будани он баҳсбарангез шуд.
Масъулони ин ниҳод дар ҳузури хабарнигорон гуфтанд, ки хидматрасонии алоқаи телефонӣ ва интернет дар Тоҷикистон арзон аст ва мардум тавони молӣ ва дастрасӣ ба онро доранд.
Масъулин дар посух ба суолоти вобаста ба гарон будани нархи интернету шикояти мардум аз заъфи он, танҳо гуфтанд, ки “ин шикоятҳо асос надоранд.”
Ин дар ҳолест, ки ҳамвора корбарон дар шабакаҳои иҷтимоӣ аз ин мушкилоти рӯз ҳарф мезананд. Ба гуфтаи бархе корбарон, интернет дар баъзе навоҳӣ то он ҳад заъиф аст, ки як паёми садоӣ фиристодан чанд дақиқа вақт лозим аст, ки ба тарафи дигар ирсол шавад, аммо масъулин дар нишасти хабарӣ ин ҳамаро рад мекунанд ва далилашон ин аст, ки “сайёҳоне, ки ба Тоҷикистон меоянд, дар шабакаҳои иҷтимоӣ бемушкилӣ навор гирифта, дар интернет нашр мекунанд.”
Пеш аз ин, созмони Broadband Genie дар гузорише, ки моҳи апрел нашр карда буд навишт, ки нархи интернет дар Тоҷикистон дар муқоиса ба даромади мардум хеле гарон аст.
Сардори Раёсати алоқаи ин ниҳод Рафиқҷон Шокиров гузоришҳои байналмилалиро дар бораи гаронии нарх ва паст будани суръати интернет дар кишварро дурӯғ ва бадқасдона хонд.
Коршиносони соҳаи фановарӣ омили ассосии гаронии интернет ва алоқаи мобилиро дар инҳисор қарор доштани тиҷорати итернет медонанд.
Баъди он ки Бек Сабур, қудои Эмомалӣ Раҳмон раёсати Хадамоти алоқаро бар дӯш гирифт, нархи хизматрасониҳо ва сифати кори интернет поин рафт ва зиёда аз 10 сол мешавад, ки танҳо воридкунандаи интернет ширкати давлатии “ТОҶИКТЕЛЕКОМ” мебошад. Соли 2024 ба ду ширкат иҷозат дода шуд, ки қисман интернетро ворид кунанд, вале то ҳанӯз ин кор оғоз нашудааст.
Дар миёни кишварҳои Осиёи Марказӣ Тоҷикистон аз назари гарон будани нарх ва паст будани суръати интернет дар мақоми аз ҳама охир қарор дорад.
