Мақомоти олии Тоҷикистон ва Арманистон дар бораи ҳамкориҳои имрӯзу фардои худ дар шаҳри Ереван бо ҳам гуфтугӯ карданд.
Бино ба иттилои расмӣ, 9-уми сентябри соли 2024 Содиқ Имомӣ, муовини вазири корҳои хориҷии Ҷумҳурии Тоҷикистон бо Мнатсакан Сафарян, муовини вазири корҳои хориҷии Ҷумҳурии Арманистон дар Ереван мулоқот кард.
Ба қавли манбаъ, дар рафти ин мулоқот ҷонибҳо ба ҳамкории ду кишвар дар ҷаҳорчӯби созмонҳои байналмилалӣ ва минтақавӣ дахл карда, инчунин масоили рӯзмарраи муносибатҳои дуҷонибаро дар соҳаҳои сиёсӣ, тиҷоративу иқтисодӣ ва фарҳангию гуманитарӣ” низ мавриди баҳсу муҳокима қарор доданд.
Ҳамзамон муовинони вазирони корҳои хориҷии Тоҷикистон ва Арманистон дар ин мулоқот “ба мавзуҳои машваратҳои сиёсӣ, ки 12-13 сентябри соли 2024 дар шаҳри Душанбе доир мегардад”, баҳсу гуфтугӯ карданд.
Гуфта мешавад, Содиқ Имомӣ, муовини вазири корҳои хориҷии Тоҷикистон барои иштирок дар нишасти “Муколамаи Ереван”, ки имрӯз дар шаҳри Ереван, пойтахти Араманистон оғоз шуд, ба ин кишвар сафар кардааст. Вай дар ҳошияи ин нишаст бо бархе ҳамтоёнаш аз дигар кишварҳо, аз ҷумла бо Никола Стоянович, котиби давлатии Вазорати корҳои хориҷии Ҷумҳурии Сербия низ мулоқот кардааст.
