Сафорати Тоҷикистон дар Русия 10-уми сентябри соли ҷорӣ бо нашри як иттилоия аз шаҳрвандони кишвар хост, ки бидуни зарурат ба Русия сафар накунанд.
Дар ин иттилоия омадааст, ки сафорати Ҷумҳурии Тоҷикистон дар Федератсияи Русия бо назардошти идомаи режими назорати шадид дар гузаргоҳҳои марзии заминӣ ва ҳавоии ин кишвар, ба шаҳрвандони Тоҷикистон ин тавсияро додааст.
Мақомоти дипломатии Тоҷикистон мегӯянд, шаҳрвандони кишвар дар аввал хуб баррасӣ кунанд, ки сафарашон ба ин кишвар то куҷо зарур аст, пас аз он тасмими сафарро бигиранд ва дар акси ҳол аз чунин тасмим даст бикашанд.
Сафарота таъкид мекунад, ки ин пешниҳод бо мақсади ҳифзи амнияти шаҳрвандон ва пешгирии мушкилоти эҳтимолӣ ҳангоми вуруд ба қаламрави Русия матраҳ шудааст.
Ҳамзамон 10-уми сентябр сафорати Тоҷикистон дар Минск ҳам хабар дод, ки ба сабаби ташдиди назорат дар гузаргоҳҳои марзии Белорус шаҳрвандон аз сафар ба ин кишвар худдорӣ кунанд. Вале намояндагонои сафаоратҳои Тоҷикистон дар Русия ва Белорус дар ин бора ҷузъиёти бештар намедиҳанд.
Ин ҳам дар ҳолест, ки чанд моҳи ахир муҳоҷирони тоҷик ҳангоми вуруд ба хоки Русия аз сахтгириҳои марзбонони рус шикоят мекунанд. Дар наворҳое, ки дар шабкаҳои иҷтимоӣ нашр шудааст, гуфта мешавад, ки марзбонони Русия ҳам дар марзҳои заминӣ ва ҳам дар фурӯдгоҳҳо шаҳрвандони Тоҷикистонро сахт тафтиш мекунанд. Ва ҳоалтҳое ҳам пеш омада, ки онҳоро барои ворид шудан ба ин кишвар иҷозат намедиҳанд ва ба Ватан бозпас мефиристанд.
Ба гуфтаи коршиносон, мақомоти Русия тафтишоту ихроҷи шаҳрвандони Тоҷикистонро бахусус пас аз ҳодисаҳои хунин дар “Крокус Сити Ҳолл” ва гаравгонгирӣ дар зиндони Волгоград, ки гумонбарони асосии ин ду ҳодиса зодагони Тоҷикистон гуфта мешаванд, шиддат бахшид.
