Гурӯҳе аз мухолифони тоҷики муқими Аврупо зимни нишасте аз дахолатҳои мустақими Русия дар умури кишварҳои Осиёи Маракзӣ интиқод карданд.
Нишасти мухолифони тоҷик рӯзи 13-уми май дар пойтахти Литва шаҳри Вилнюс бо ҳузури бархе созмону шахсиятҳои сиёсии минтақа баргузор шуд. Ин ҳамоиш аз сӯи Бунёди дифоъ аз демокросӣ дар Осиёи Марказӣ (FFDDCA), ки раҳбариашро Шарфоддин Гадоев, яке аз мухолифони тоҷики муқими Аврупо бар уҳда дорад, роҳандозӣ шуд.
Ҳамоиш зери унвони “таҷовузи Русия ба хоки Украина ва густариши нуфузи он дар Осиёи Марказӣ” номгузорӣ шуда буд. Асосан масъалаи поймол шудани ҳуқуқи инсон аз сӯи режимҳои зери ҳимояи Кремлин ва паёмадҳои таблиғотии Русия дар минтақа баҳсу баррасӣ шуд. Ба назари масъулони ҳамоиш “идомаи таҷовуз Русия ба хоки Украина на танҳо барои Аврупо Шарқӣ, балки барои минтақаи васеи кишварҳои пасошӯравӣ, бахусус Осиёи Марказӣ оқибатҳои ногувор хоҳад дошт”.
Дар конфронс сиёсатмадорон, коршиносони амниятӣ намояндагони ҷомеаи шаҳрвандӣ аз Аврупову Осиёи Марказӣ иштироку суханронӣ карданд. Суханварон аз Узбекистон ва Туркманистон дар бораи вазъияти кишварҳояшон гузориш доданд.
Раҳмон Абдусамӣ, ҳомии ҳуқуқи инсон ва коршинос аз Узбекистон зимни суханронияш бо изҳори тааҷҷуб гуфт, ки солҳои қабл режими Тоҷикистон роҳҳои фишору таъқиби мунтақидонашро аз Узбакистон меомӯхт, аммо ҳоло дар ин ҷода режими Эмомалӣ Раҳмон ба маротиб аз Узбекистон пеш рафтааст.
Ин аввалин чунин ҳамоише аст, ки аз сӯи бунёди зери раҳбарии Шарфоддин Гадоев пас аз хориҷ шуданаш аз ПМТ – эътилофи қисме аз мухолифони тоҷик дар Аврупо роҳандозӣ мешавад.
Ёдовар мешавем, ки чанде пеш Шарфоддин Гадоев бо нашри матлабе дар саҳфаи фейсбукияш аз сафар карданаш ба Афғонистон, ки ҳоло зери раҳбарии Толибон қарор дорад, хабар дода буд. Ӯ мегуфт, бо даъвати як созмони ҷамъиятӣ ба ин кишвар рафтааст ва бештар масъалаи равобити шаҳрвандони ду кишвар баррасӣ гашт. Аммо Гадоев дар конфронси Вилнюс ба масъалаи мушаххасе перомуни сафараш ба Кобул нақл накард.
