Ҳаҷми гардиши тиҷорати хориҷии Тоҷикистон дар моҳҳои январ-апрели соли 2025 ҳудуди 3,1 миллиард долларро ташкил дод, ки нисбат ба ҳамин давраи соли гузашта 13,8% бештар мебошад.
Тибқи маълумоти Агентии омори назди Президенти ҶТ, содироти маҳсулот 636 миллион доллар ва молҳои воридотии ҷумҳурӣ қариб 2,5 миллиард долларро ташкил додааст, ки тафовути манфии тавозуни савдо тақрибан ба 1,9 миллиард доллар расидааст. Яъне, дар кишвар воридот 4 маротиба бештар аз содирот будааст.
Инчунин воридот нисбат ба ҳамин давраи соли 2024 қариб 24% афзудааст. Молу маҳсулот асосан аз Русия (28,3% аз ҳаҷми умумии воридот), Чин (23,9%) ва Қазоқистон (13,7%) ба Тоҷикистон ворид гаштааст.
Ҳамзамон содирот дар моҳҳои январ–апрели соли ҷорӣ 13% коҳиш ёфтааст ва он асосан ба коҳиши назарраси фурӯши металл ва сангҳои гаронбаҳо (аз 299 миллион то 1,2 миллион доллар) ва содироти маҳсулоти минералӣ рабт дорад.
Тақрибан 80% содироти Тоҷикистон ҳамоно аз молҳои ашёи хом, ба монанди алюминий ва дигар металлҳо иборат аст.
Гуфта мешавад, Тоҷикистон аз ҳама бештар ба Ҳолланд (25,6% аз ҳаҷми умумии содирот), Чин (20.8%) ва Туркия (14,7%) маҳсулот содир кардааст.
Мутахассисони соҳаи иқтисод таъкид мекунанд, ки касри тавозуни тиҷоратӣ воридшавии асъори хориҷиро кам мекунад, ки барои хариди молҳои ҳаётан муҳим аз хориҷ зарур аст. Агар ин вазъият дуру дароз давом кунад, кишвар маҷбур мешавад захираҳои асъориро истифода барад ё қарзҳои хориҷӣ гирад, ки ин сабаби афзоиши қарзи давлатӣ ва беқурбшавии пули миллӣ мегардад. Яке аз сабабҳои болоравии нархҳо дар кишвар низ ба вобастагии аз ҳад зиёди иқтисод аз воридот мебошад.
Бо вуҷуди нобаробарӣ дар воридот ва содирот, Тоҷикистон тавонистааст аз ҳисоби пули фиристодаи муҳоҷирони кории тоҷик суботи нисбии иқтисодиро нигоҳ дорад.
Тибқи оморҳои Бонки ҷаҳонӣ, соли 2024 ҳаҷми интиқоли маблағ ба Тоҷикистон аз ҷониби муҳоҷирони корӣ ҳудуди 5,8 млрд долларро ташкил дод, ки 27% зиёдтар нисбат ба соли 2023 мебошад ва ин ҳудуди 45% аз ҳаҷми Маҷмуи маҳслуоти дохилӣ (ММД)-и Тоҷикистон аст.
