Артиши Исроил рӯзи якшанбе, 6-уми июл эълом кард, ки ба чанд бандар ва пойгоҳҳои низомии Ҳусиҳо дар Яман ҳамла кардааст.
Дар ин ҳамлаи ҳавоӣ бандарҳои “Ал-Ҳудайда”, “Раъсу Исо”, “Ас-Сулайф” ва нерӯгоҳи барқии “Ал-Ҳудайда” мавриди ҳамла қарор гирифтнд. Ба иттилои артиши Исроил, ҳамла ба зерсохторҳои муҳими Яман дар ҷавоб ба ҳамлаи Ҳусияҳо ба Исроил сурат гирифтааст.
Тавре гуфта мешавад, Ҳусиҳои Яман қаблан Фурӯдгоҳи Бин-Гурени Исроилро мавриди ҳадафи мушакии худ қарор доданд, ки дар натиҷа ин фурӯдгоҳ чанд соат таътил шуд ва парвозҳо ба таъхир гузошта шуданд.
Артиши Исроил лаҳзае пеш аз ҳамла эълон кард, ки мардуми ғайри низомӣ бандарҳо ва атрофи нерӯгоҳро холӣ кунанд. Исроил ҳамчунин ба киштии “Galaxy Leader”, ки моҳи ноябри соли 2023 аз ҷониби Ҳусиҳо гирифта шуда буд, ҳамла кард. Гуфта мешуд, Ҳусиҳои Яман бо мақсадҳои низомӣ аз он киштӣ истифода мекарданд.
Дар ҳамин ҳол сухангӯи артиши Ҳусиҳо Яҳё Сареъ гуфт, ки “падофанди мо дар хунсо кардани ҳамлаҳои Исроил алайҳи кишварамон муваффақ буд. Ва дар посух ба ин таҷовуз мо фавран бо мушакҳои “Hypersonic” ба Фурӯдгоҳи Бин-Гурин бандари Усдуд, нерӯгоҳи барқии Асқалон ва бо 8 паҳпод ба бандари Илот ҳамла кардем.”
Сухангӯи Ҳусиҳо афзуда, ки ҳамлаҳояшон ба Исроил ба хотири дифоъ аз ҳаққи мардуми Ғазза аст. Ӯ иддао намуда, ки то замони идомаи бомборонҳои Исроил ба Ғазза ва муҳосираи ин борика ҳамлаҳои ин гурӯҳ ба Исроил идома хоҳад дошт.
Аммо Исроил ва ҳампаймононаш Ҳусиёни Яманро гурӯҳҳои ниёбатии Эрон медонанд ва ба маконҳои стратегии низомӣ ва иқтисодии он, аз ҷумла бандари “Ал-Ҳудайда”, ки барои мардуми Яман маркази иқтисодии муҳим маҳсуб мешавад, бомборон мекунад.
