Пас аз баргузории ҷашнвораи фарҳангии тоҷикон дар шаҳри Красноярски Русия, ду ҷавони тоҷик бо иттиҳоми озору азияти ду духтари 14-сола боздошт шудаанд.
Ба иттилои расонаҳои маҳаллӣ, дар пайи ин ҳодиса мақомоти ҳифзи ҳуқуқ таҳқиқотро оғоз кардаанд.
Дар шабакаҳои иҷтимоӣ наворе низ паҳн шудааст, ки боздошти ин ду ҷавонро дар дохили мошини пулис нишон медиҳад. Мақомоти Русия гуфтанд, ки таҳқиқи парванда идома дорад ва онҳоро хатари ихроҷ аз қаламрави Русия таҳдид мекунад.
Гуфта мешавад, ҳодисаи мазкур пас аз баргузории як чорабинии фарҳангии тоҷикон сурат гирифта, баҳсу вокунишҳои зиёдро дар фазои расонаии Русия ба бор овардааст.
Ба назари муҳоҷирони фаъол, чунин рафторҳои ғайриқонунии баъзе аз муҳоҷирон метавонад боиси афзоиши хашму норозигии сокинони маҳаллӣ гардад ва ба обрӯи садҳо ҳазор муҳоҷири қонунию заҳматкаши тоҷик таъсири манфӣ расонад.
Мунтақидон ҳукумат мегуянд, бо вуҷуди муҳоҷирати даҳҳо ҳазор ҷавон ба Русия ва дигар кишварҳо, ҳукумат ва махсусан Вазорати фарҳанги Тоҷикистон то ҳол натавонистаанд механизми муассиреро барои таблиғ ва омӯзиши фарҳанги асили миллӣ, рафтори дуруст ва риояи арзишҳои ахлоқӣ дар байни муҳоҷирон роҳандозӣ кунанд.
