Як марди 31-солаи тоҷик рӯзи душанбе аз ҷониби додгоҳи Роттердами Ҳуланд ба панҷуним сол маҳкум ба зиндон шуд.
Бино ба иттилои расонаҳои ҳуландӣ, Абдусамад А., аз ҷониби мақомоти додситонӣ ба ҷалби аъзо барои гурӯҳи террористии «Давлати Исломии Ироқ ва Шом» (ДИИШ) дар чандин кишвар, аз ҷумла Ҳуланд, гумонбар дониста мешуд ва ҳадаф аз ин амалҳоро омодасозии ҳамлаҳо арзёбӣ кардаанд.
Додгоҳ гуфт, ки Абдусамад А. барои ҷомеаи Ҳуланд хатари ҷиддӣ дорад ва ба қавли додгоҳ вай талош мекард, ки ҳарчи бештар пул ба манфиати ин гурӯҳи террористӣ ҷамъоварӣ кунад.
Додситони кулли Ҳуланд (Openbaar Ministerie, OM) барои ӯ 8 сол ҳукми зиндон талаб карда буд. Ба гуфтаи онҳо, Абдусамад А. бо шохаи афғонистонии ДИИШ — Вилояти Хуросони Давлати Исломӣ (ISKP) иртибот доштааст.
Гуфтанист, ӯ моҳи июли соли 2023 дар шаҳри Эйндҳовен боздошт шуда буд. Агентии амниятии Ҳуланд (AIVD) ӯро чун узви гумонбари ДОИШ шиносоӣ карда, иттилоъ дода буд, ки ӯ дастур гирифтааст барои ҳамлаҳо омодагӣ бинад. Гарчанде нақшаҳои дақиқи ҳамла ошкор нашуданд, додситонҳо таҳдидро ҷиддӣ ва воқеӣ арзёбӣ карданд.
Ба иттилои додгоҳ, Абдусамад А. бо афроди ҳаммаслак дар чандин кишвар робита дошт ва фаъолона кӯшиш мекард дигаронро низ ҷалб кунад. Сафараш ба Ҳуланд низ дар ҳамин замина арзёбӣ шудааст. Додрасон таъкид намуданд: «Ӯ барои ҷомеаи Ҳуланд хатарнок аст».
Дар ҷараёни як амалиёти махфии пулис, гуфта мешавад, ки ӯ эълон карда, ба ДИИШ байъат эълон кардааст, ҳарчанд худи ӯ дар суд инро рад намуда гуфтааст: «Шояд гуфта бошам, аммо ба хотири таъсиргузорӣ. Онҳо ин созмонро дӯст медоштанд».
Вай иддао кард, ки ҳеч робитае бо ДИИШ надорад. Додгоҳ ҳукм кард, ки Абдусамад А. ҷузъи як шабакаи бузургтар будааст. Пулиси Ҳуланд бо мақомоти Олмон ҳамкорӣ намудааст, зеро ӯ дар иёлати Шимолии Рейн – Вестфалияи Олмон низ робита доштааст. Соли 2023 мақомоти Олмон дар ҳамон минтақа 7 нафар гумонбарро дар робита ба тарҳрезии ҳамла боздошт карданд.
Ҳамчунин, ба гуфтаи додситонҳо, ӯ соли 2016 кӯшиш кардааст ба Сурия барои пайвастан ба ДОИШ равад, вале мақомоти Туркия ӯро боздошта, ба Украина депорт карданд, ки гӯё он ҷо ба ҳуҷраи ДОИШ дар Украина пайвастааст.
Ҳамсари онвақтаи Абдусамад А., ки соли 2023 ҳамроҳ бо ӯ боздошт шуда буд, соли гузашта сафед шуд. Онҳо аз соли 2022 дар Ҳуланд мезистанд ва ҳоло аз ҳам ҷудо шудаанд.
Вакили дифоъи ӯ гуфт, ки далелҳои кофӣ барои аъзогии гурӯҳи террористӣ вуҷуд надорад ва парванда асоси заифи ҳуқуқӣ дорад.
