Пас аз анҷоми музокироти раисҷумҳури худкомаи Тоҷикистон Эмомалӣ Раҳмон ва президенти Муғулистон Ухнаагийн Хурэлсух дар шаҳри Душанбе даҳ санади ҳамкориро миёни ниҳодҳои гунонуни ду кишвар ба имзо расид.
Имрӯз, 24-уми июл дар Қасри миллат Раҳмонов ва Хурэлсух ба Изҳороти муштараки Ҷумҳурии Тоҷикистон ва Муғулистон дар мавриди рушди минбаъда, таҳкими муносибатҳои дӯстона ва ҳамкории гуногунҷанба имзо гузоштанд.
Илова бар ин, бастае иборат аз даҳ ёддошти тафоҳум байни ниҳодҳо ва ташкилотҳои гуногуни кишварҳо тасдиқ гардид, ки доираи васеи самтҳои ҳамкории ҷонибҳоро дар бар мегиранд. Аз ҷумлаи ҳуҷҷатҳои имзошуда, ёддошти тафоҳум байни вазоратҳои корҳои хориҷӣ, инчунин ёддоштҳои тафоҳум дар соҳаҳои энергетика, кишоварзӣ, сайёҳӣ ва технологияҳои рақамӣ, ҳамкориҳои илмӣ, амниятӣ, таҳлилӣ ва фаъолияти осорхонаӣ мебошанд.
Баъди маросими имзои санадҳои ҳамкорӣ, нишасти матбуотии сарони давлатҳо ва нахустин Форуми сармоягузории Тоҷикистону Муғулистон баргузор гардидааст.
Ёдовар мешавем, ки раисҷумҳури Муғулистон Ухнаагийн Хурэлсух бо сафари давлатӣ шоми 23-юми июл ба шаҳри Душанбе, пойтахти Тоҷикистон омада буд.
Сафари давлатии раисҷумҳури Муғулистон то 26-уми июл идома ёфта, дар баробари мулоқоту музокироти сатҳи олии кишварҳо ва имзои санадҳои нави ҳамкориву ҳамоиши доираҳои соҳибкорӣ ва тиҷоратӣ, рӯзҳои фарҳанги Муғулистон низ шоми имрӯз дар Тоҷикистон баргузор мегардад.
