Президенти Фаронса Эммануэл Макрон эълон кард, ки кишвараш ният дорад дар моҳи сентябри соли 2025, дар ҷаласаи Маҷмаи Умумии СММ, Давлати Фаластинро ба расмият бишиносад.
Макрон таъкид намуд, ки эътироф бояд бо шароити мушаххас амалӣ гардад, аз ҷумла: оташбас дар Ғазза, озодсозии гаравгонҳо, расонидани кумакҳои башардӯстона ва эҷоди давлати қобили ҳаёти фаластинӣ, ки Исроилро эътироф мекунад.
Бархе расонаҳо дар бораи афзоиши фишорҳои вакилон ва дигар намояндаҳои Бритонияи Кабир болои ҳукумати ин кишвар хабар дода гуфтаанд, ки эҳтимол дорад Ландан дар ин иқдом Порисро ҳамроҳӣ кунад ва ё баъд аз муддати кӯтоҳе он ҳам Давлати Фаластинро ба расмият бишоносад.
Ин тасмим бо вокунишҳои гуногун рӯбарӯ шудааст: Исроил ва ИМА онро танқид карданд, дар ҳоле ки гурӯҳи Ҳамос ва як қатор кишварҳои арабӣ аз он истиқбол намуданд.
Гуфтанист, эҳтимол меравад иқдоми Париж фишорро болои дигар кишварҳои аврупоӣ барои пайравӣ аз он бештар кунад. Фаронса бо ин иқдоми худ нахустин кишвари узви гурӯҳи G7 хоҳад буд, ки Давлати Фаластинро ба расмият мешиносад.
Инчунин бархе мақомоти Фаронса иддаъо доранд, ки Порис бо шарти таъсиси кишвари бидуни силоҳ, ки дар оянда Исроилро таҳдид накунад, Давлати Фаластинро ба расмият хоҳад шинохт. Иддаъое, ки хеле аз фаластиниҳо онро қабул надоранд.
