Рамзан Қодиров, раҳбари Чеченистон, рӯзи 24-уми июл ҳангоми истироҳат дар як меҳмонхонаи панҷситорадори минтақаи Кайнар дар шаҳри Бодруми Туркия ногаҳон беҳуш шудааст.
Ба гуфтаи расонаҳои туркӣ, Қодиров баъди ворид шудан ба об ногаҳон худро бад ҳис карда, беҳуш шудааст. Ҳодисаи мазкур таваҷҷуҳи васеи ҷомеаи байналмилалиро ба худ ҷалб намудааст.
Кормандони меҳмонхона ва гурӯҳи наҷотбахш ба зудӣ вориди амал шуда, ӯро аз об берун оварда, ба беморхона интиқол доданд. Табибон вазъи саломатии ӯро пас аз расонидани кӯмаки аввалия мӯътадил арзёбӣ кардаанд. Қодиров ҳоло таҳти назорати табибон қарор дорад.
Ин ҳодиса дар ҳоле рӯй дод, ки дар гузашта низ гузоришҳо дар бораи мушкилоти саломатии Қодиров, аз ҷумла бемориҳои гурда, расонаӣ шуда буданд. Аммо то ҳол мақомоти расмии Чеченистон ё Кремл дар бораи ин ҳодисаи охирин расман изҳори назар накардаанд.
