Мақомоти Эрон ҳушдор додаанд, ки кишвар ба яке аз сахттарин буҳронҳои об дар солҳои охир рӯ ба рӯ шудааст.
Бино ба иттилои расонаҳои байналмилалӣ, ҳарорати ҳаво дар чанде аз минтақаҳои Эрон аз марзи +50 дараҷа гузашта, обанборҳо ва нерӯгоҳҳои кишвар дар ҳолати ногувор қарор доранд.
Дар як изҳороти расмӣ мақомоти Теҳрон аз мардум даъват карданд, ки обро сарфакорона истифода кунанд, зеро сатҳи оби обанборҳои асосӣ то ба 10-15 дарсади иқтидори воқеӣ поин рафтааст.
Дар пайи мушкилоти буҳрони шадиди камобӣ дар Эрон ва шикояти шаҳрвандон аз қатъ шудани об, Масъуд Пизишкиён, президенти ин кишвар аз чанд обанбор дар вилояти Албурз, аз ҷумла обанбори Караҷ ва Толеқон боздид намуд.
Ба гуфтаи таҳлилгарон, чанд омил, аз ҷумла таъсири гармо дар сатҳи ҷаҳонӣ, идоракунии нодурусти захираҳои об, истифодаи зиёди об дар бахши кишоварзӣ ва беназоратӣ аз сӯи мақомот боиси амиқтар шудани буҳрони об шудааст. Дар бархе минтақаҳо, сокинон аз қатъи барқ ва маҳдудияти дастрасӣ ба оби нӯшокӣ шикоят доранд.
Ҳукумати Масъуд Пизишкиён гуфтааст, ки раванди ислоҳи низоми обрасонӣ ва тақсимоти одилонаи обро дар барномаи худ қарор додааст. Аммо коршиносон бар инанд, ки бидуни ислоҳоти ҷиддӣ дар сиёсати захираҳои обӣ, буҳрони феълӣ метавонад ба буҳрони иҷтимоиву муҳоҷирати экологӣ табдил ёбад.
Ин вазъият дар ҳоле сурат мегирад, ки чанд сол боз Эрон бо боришоти кам, хушксолӣ ва обхезиҳои ғайричашмдошт рӯ ба рӯ аст.
