Собиқ сафири Ироқ дар Тоҷикистон мегӯяд, пеш аз оғози ҷанги Ироқ Эмомалӣ Раҳмон барояш гуфтааст, ки ба Русия эътимод накунед!
Мазҳар Ад-Дувайрӣ, собиқ сафири Ироқи дар Тоҷикистон, ки мақарри иқоматаш дар Маскав буд, мегӯяд, пас аз он ки Эътимодномаи худро ҳамчун сафир ба Эмомалӣ Раҳмон дар шаҳри Душанбе супоридам, Президенти Тоҷикистон бо эҳтироми хоссе аз вай пазироӣ карда, бо вуҷуди танг будани толори пазироӣ гуфтааст, биё дар паҳлуи ман бишин.
Ба гуфтаи собиқ сафир, вақте суҳбат оғоз шуд, Эмомалӣ Раҳмон барояш гуфт, ту сафир ҳастӣ, дар ҳамон меҳмонхонае, ки дар он истиқомат дорӣ, дидӣ, ки дар куҷо ҷойгир аст ва атрофи он чи чизҳое вуҷуд дорад? Дар посух барояш гуфтам, бале дидам. Эмомалӣ Раҳмон гуфт, яке аз пойгоҳҳои низомии Русия пушти ҳамон меҳмонхона аст.
Аммо вақте ҷанги дохилӣ шуруъ шуд, нерӯҳои мухолифин бо раҳбарии Абдуллоҳ аз ҳамон ҷо низ қароргоҳи президентро мавриди ҳамла қарор медоданд, вале аз дасти русҳо коре намеомад. Русҳо аз Эмомалӣ Раҳмон ҳимоят карданд, вале он замон имкони кумак кардан надоштанд. Имконоти онҳо маҳдуд буд.
Мазҳар Ад-Дувайрӣ, ки хотироти худро бо шабакаи “Ал-Арабия” дар миён гузоштааст, меафзояд, он замон дар соли 2002 дар вақти суҳбат кардан Эмомалӣ Раҳмон нахуст аз вазъи Ироқ пурсид, гуфтам, тамоми талошҳо барои пешгирӣ кардан аз ҷанг анҷом мешавад, аммо ба гуфтаи ӯ, бархе мақомоти русӣ ба вай пештар гуфта буданд, ки қарор дар бораи оғози ҷанги Ироқ гирифта шудааст ва ин ҷанг ногузир анҷом мешавад.
Дар ҳамон мулоқот, Эмомалӣ Раҳмон ба сафири Ироқ гуфтааст, ки дар хусуси ин ҷанг Бағдод ба Маскав эътимод накунад, зеро Ироқ як давлати паҳновар асту имконоти Русия дар он кишвар маҳдуд мебошанд. Ба ҳамин хотир ин тавсияро ба кишвараш мунтақил кунад.
Гуфта мешавад, Иёлоти Муттаҳидаи Амрико ва муттаҳидонаш бо иттиҳоми он ки Саддом Ҳусейн, Президенти Ироқ ба силлоҳҳои кушторҳои ҷамъӣ даст ёфтааст, дар соли 2003 алайҳи Ироқ ҷангро оғоз карданд. Саддом Ҳусейнро боздошт ва сипас ӯро моҳи декабри соли 2006 дар рӯзи Иди Қурбон ба дор овехтанд.
Саддом Ҳусейн, ки раҳбари Ҳизби эҳёи арабии сотсиалистии Ироқ (حزب البعث العربي الاشتراكي) буд, дар минтақа яке аз муттаҳидони асосии Русия донист мешуд, қариб ҳама таҷҳизоти низомиашро аз Русия дастрас мекард. Ба ҳамин хотир, бо русҳо робитаи хуб дошт. Эҳтимол, Президенти Тоҷикистон ҳам ин ҳамаро ба назар гирифта, ба ҳамин хотир ба сафири Ироқ дар Тоҷикистон тавсия кардааст, ки набояд ба Русия эътимод кунанд.
Ҷанг дар Ироқ аз соли 2003 то 2011 идома ёфт, яъне ҳудуди 8 сол тӯл кашид, вале Амрико ва муттаҳидонаш ҳеч гуна силоҳи куштори ҷамъӣ аз Ироқ наёфтанд. Вале дар ин муддат Ироқро ба дасти гурӯҳҳое таслим карданд, ки инак 22 сол аст, суботу оромиро дар ин кишвар барқарор карда натавонистанд.
