Ба назари бархе аз коршиносон, аксари аъзои ДИИШ, ки дар Афғонистон ҳузур доранд, дар кишварҳои Тоҷикистону Покистон омода шуда, ба Афғонистон меоянд.
Расонаҳои Афғонистон бо такя ба раиси Кумитаи амнияти Узбекистон хабар доданд, ки як узви шохаи “Хуросон”-и ДИИШ, ки чанде пеш дар шаҳри Намангони Узбекистон боздошт шуда буд, бо афроде дар Тоҷикистон ва Покистон иртибот доштааст.
Саидбиллол Фотимӣ, ки аз ӯ ҳамчун коршиноси равобити байналмилалӣ ёд мешавад, дар як мусоҳиба бо шабакаи “Як”-и Афғонистон иддао кардааст, ки аксари террористон ва аъзоёни ДИИШ тоҷиконе ҳастанд, ки дар Тоҷикистон ва Покистон омода мешаванд.
Ҷаноби Фотимӣ мегӯяд, ки амалиётҳо дар Маскав, Калифорния, Эрон, Кандаҳор, ҳамла ба шаҳрвандони чинӣ ва ҳамла ба Гулбиддин Ҳикматёр дар Кобул аз ҷониби тоҷиконе сурат гирифтааст, ки дар Покистон таълим дидаанд.
Ӯ дар поён изҳор медорад, ки Тоҷикистон ва Покистон маркази гурӯҳҳои террористӣ ҳастанд ва бояд ба рӯйхати сиёҳи Созмони Милали Муттаҳид ворид карда шаванд — на Афғонистон.
Фотимӣ мегӯяд, ки Афғонистон ҳеҷ гуна хатаре барои Тоҷикистон ва Покистон надорад. Баръакс, ин ду кишвар ба амнияти Афғонистон хатар эҷод мекунанд.
То ба ҳол Тоҷикистон дар бораи ин изҳороти Саидбиллол Фотимӣ коршиноси равобити байналмилал ҳеҷ гуна вокуниш нишон надодааст.
Ёдовар мешавем, ки чанде пеш дар шаҳри Намангони Узбекистон як гурӯҳи вобаста ба “Хуросон”-и ДИИШ боздошт шуд, ки роҳбарии онро як духтари 19-сола ба уҳда доштааст.
