Ваколатдори ҳуқуқи инсон дар Тоҷикистон мегӯяд, рӯзноманигорони зиндонии тоҷик дар ҳоли ҳозир шикояте надоранд, аммо пештар пайвандонашон аз вазъи саломатӣ ва шароити нигоҳдории онҳо шикоят карда буданд.
Имрӯз, 4-уми август, Ҳусниддин Нидоев, муовини сардори Шуъбаи ҳифзи ҳуқуқҳои шаҳрвандӣ ва сиёсии дастгоҳи Вақолатдор зимни нишасти матбуотӣ ба хабарнигорон гуфт, ки рӯзи 5-уми май бо Далери Имомалӣ, Завқибек Саидаминӣ, Абдуллоҳ Ғурбатӣ ва Аҳмад Иброҳим дар зиндони маъруф ба “1-ум Советский” мулоқот доштааст.
Нидоев гуфта, ки пайваста бо афроди маъруф дар расонаҳо дар ҳамеша дар тамос ҳаст ва аз сардорони муассисаҳо ҳангоми суҳбати телефонӣ аз аҳволи онҳо пурсида мешавад.
Ба иддаои ин мақомдори тоҷик, вазъи саломатии Далери Имомалӣ, Завқибек Саидаминӣ, Абдуллоҳ Ғурбатӣ ва Аҳмад Иброҳим хуб аст ва шикояте накардаанд.
Ин ҳам дар ҳолест, ки чанде пеш Мағфират Худойназарова, ҳамсари Завқибек Саидаминӣ ба расонаҳо аз вазъи бади саломатии ҳамсараш шикоят карда, гуфта буд, ки шавҳараш аз дарди сутунмуҳра ранҷ мекашад. Инчунин пас аз зиндонӣ шудан ба бемории асаб гирифтор шудаву аз дарди чашм азоб мекашад.
Ҳамзамон пайвандони Абдусаттор Пирмуҳаммадзода ба расонаҳо гуфта буданд, ки аз моҳи март ба ин сӯ наметавонанд бо ӯ дар зиндони шаҳри Хуҷанд мулоқот кунанд ва нигарони вазъи саломатияш ҳастанд.
Ба гуфтаи пайвандонаш Пирмуҳаммадзодаро кормандони зиндон пас аз суолаш, ки чаро номашро ба рӯйхати озодмешудаҳо ворид накардаанд, ба ШИЗО (ҳуҷраи ҷаримавӣ) андохтаанд.
Ҳусниддин Нидоев намояндаи Ваколатдори ҳуқуқи инсон низ дар ин робита гуфтааст, ки соли пеш бо Пирмуҳаммадзода дар зиндони Хуҷанд мулоқот доштаанд, вале имсол бо ӯ мулоқот накардааст ва ваъда дода, ки баъд аз нишаст, аз ҳоли ин рӯзноманигори зиндонӣ пурсон мешавад.
Дар нишасти имрӯза намояндагони Ваколатдор бо вуҷуди иддаои он ки аз ҳоли афроди маъруф дар расонаҳо хабар мегиранд, аз дигар зиндониёни сиёсӣ ном набурдаанд.
Гуфта мешавад, дар зиндонҳои кишвар садҳо рӯзномагигору вакилони дифоъ ва фаъолону мухолифон бе гуноҳ зиндонӣ шудаанд. Бо вуҷуди бегуноҳ зиндонӣ шуданашон мавриди шиканҷаву фишори равонӣ низ қарор мегиранд.
Созмонҳои ҳуқуқӣ ва кишварҳои ғарбӣ борҳо раҳоии онҳоро аз Ҳукумати Тоҷикистон талаб карда буданд, вале режими Раҳмонов ин талабу тавсияҳоро нодида гирифта, баръакс, фишору зиндонӣ карданҳоро нисбати дигарандешон бештар кардаанд.
