Дар давоми шаш моҳи аввали соли 2025 дар марзи Тоҷикистон бо Афғонистон 10 даргирии мусаллаҳона байни нерӯҳои амниятии Тоҷикистон ва қочоқбарони афғон ба қайд гирифта шудааст.
Зафар Самад, раиси Агентии зиддинашъаи Тоҷикистон рӯзи 29-уми июли соли ҷорӣ зимни нишасти матбуотӣ ба хабарнигорон гуфт, ки шумораи чунин ҳодисаҳо нисбат ба ҳамин давраи соли гузашта, ки он вақт ҳамагӣ 6 ҳодисаи сабт шуда буд, афзоиш ёфтааст.
Ба гуфтаи ӯ, аксари задухӯрдҳо дар манотиқи наздисарҳадии вилояти Бадахшони Афғонистон, ки бо Вилояти Мухтори Кӯҳистони Бадахшони Тоҷикистон ҳамсарҳад аст, сурат гирифтааст. Ба гуфтаи ин мақомдор, дар натиҷаи даргириҳо 4 қочоқбари маводи мухаддир, ки ҳамаи онҳо шаҳрвандони Афғонистон буданд, кушта шудаанд.
Зафар Самад иддао кардааст, ки қочоқбарон дар баъзе ҳолатҳо бо аслиҳаи вазнин ва таҷҳизоти муосир мусаллаҳ буданд.
Ӯ инчунин Афғонистонро манбаи аслии воридшавии маводи мухаддир ба Тоҷикистон номида, гуфтааст, ки танҳо дар минтақаҳои наздисарҳадӣ бо Афғонистон 1 тоннаву 692 килограмм маводи мухаддир мусодира шудааст, ки 54,4 дарсади ҳаҷми умумии мусодирашуда дар кишварро ташкил медиҳад.
Ба гуфтаи ӯ, дар маҷмуъ дар шаш моҳи аввали соли равон 3 тоннаву 107 килограмм маводи мухаддир дар қаламрави Тоҷикистон мусодира гардидааст, ки 10 килограмму 388 грамм зиёдтар нисбат ба ҳамин давраи соли гузашта мубошад.
Ин омор дар ҳолест, ки ба иддаои Зафар Самад мақомоти кишвар дар шароити ноороми вазъи Афғонистон тадобири амниятӣ дар марзро тақвият дода, ҳамкориҳои байналмилалӣ барои мубориза бо қочоқи ғайриқонунии маводи мухаддирро низ афзоиш дода истодаанд.
Дар ҳоле ин мақомдори тоҷик Афғонистонро манбаи аслии воридшавии маводи мухаддир ба Тоҷикистон меномад, ки борҳо Толибон кишварҳои ҳамсояро муттаҳам кардаанд, ки қочоқи ин мавод аз ҷониби онҳо низ зиёд сурат мегирад.
