Додгоҳи парвандаҳои ҷиноӣ дар шаҳри Венаи Австрия дархости мақомоти Тоҷикистонро барои истирдоди узви Наҳзати исломии Тоҷикистон Шавкати Муҳаммад (Шавкатҷон Шарифов), модараш Шарофат Шарифова ва бародараш Билолиддин Шарифов рад кард.
Қарори додгоҳ рӯзи 5-уми августи соли ҷорӣ эълон шуд. Ба гуфтаи намояндагони мухолифин, додгоҳ дархости мақомоти Тоҷикистонро ғайриқонунӣ дониста, аз фиристодани ҳарсе ба Тоҷикистон худдорӣ кардааст.
Вазорати корҳои дохилии Тоҷикистон моҳи апрели соли ҷорӣ аз мақомоти Австрия дархост карда буд, ки 18 шаҳрванди Тоҷикистонро, ки ба гуфтаи Душанбе бо созмонҳои мухолиф иртибот доранд, боздошт ва ба Тоҷикистон истирдод кунанд. Дар байни онҳо номи Шавкати Муҳаммад, модар ва бародараш низ зикр шудааст.
Мақомоти Тоҷикистон Шавкати Муҳаммад ва наздиконашро ба тундгароӣ муттаҳам мекунанд. Аммо худи онҳо ин иттиҳомҳоро рад карда, парвандаро дорои ангезаи сиёсӣ медонанд.
Шавкати Муҳаммад сухангӯи эътилофи мухолифи “Паймони миллии Тоҷикистон” буда, беш аз даҳ сол аст берун аз кишвар ба сар мебарад. Ӯ дар шабакаҳои иҷтимоӣ фаъолияти густурда дошта, аз мунтақидони шадиди сиёсати ҳукумати Тоҷикистон ба шумор меравад.
Қаблан созмони “Ҷавонони Тоҷикистон барои эҳёи Тоҷикистон” низ хабар дода буд, ки мақомоти Тоҷикистон аз Австрия истирдоди 18 шаҳрванди тоҷикро, ки ба гуфтаи Душанбе бо гурӯҳҳои мухолиф иртибот доранд, дархост кардаанд.
Ин бори аввал нест, ки мақомоти додгҳии Австрия чунин дархостро рад мекунанд. Пештар низ Додгоҳи Вена аз истирдоди се шаҳрванди дигари Тоҷикистон, аз ҷумла як узви Ҳаракати сиёсии “Гурӯҳи 24” худдорӣ карда буд.
