Тоҷикистон қасд дорад дар соли ҷорӣ беш аз 702,5 миллион доллар қарз ва грант ҷалб кунад.
Вазорати молияи кишвар хабар дод, ки дар соли ҷорӣ ҷалби беш аз 7,9 миллиард сомонӣ (702,5 миллион доллар) қарзу грант аз ниҳодҳои молии байналмилалӣ ва кишварҳои алоҳида дар назар аст.
Беш аз 3,2 миллиард сомонӣ (286,8 миллион доллар) аз ин маблағҳо маблағҳои қарзӣ буда, ҳаҷми маблағҳои грантӣ беш аз 4,6 миллиард сомонӣ (415,6 миллион доллар) хоҳад буд.
Ба иддаои Вазорати молия, ин маблағҳо барои татбиқи лоиҳаҳои сармоягузории давлатӣ дар соҳаҳои гуногун, аз ҷумла нақлиёту коммуникатсия, энергетика, маориф, тандурустӣ ва ҳифзи иҷтимоӣ, дастгирии буҷет ва ғайра ҷалб карда мешаванд.
То оғози соли ҷорӣ қарзи хориҷии кишвар 3,2 миллиард долларро ташкил медод.