Арабистони Саудӣ дар соли ҷорӣ барои адои маросими Ҳаҷ ба Тоҷикистон беш аз 3,5 ҳазор квота ҷудо кардааст.
Вазорати умури ҳаҷ ва умраи Арабистони Саудӣ теъдоди квотаҳоро барои адои маросими ҳаҷ дар соли 2022 эълон кард, ки тибқи он 3562 шаҳрванди Тоҷикистон имкони адои маросими Ҳаҷро доранд.
Ба фарқ аз солҳои қабл имсол баъзе маҳдудиятҳо, аз ҷумла маҳдудияти синну сол ҷорӣ карда шуда, афроди аз 65-сола боло барои адои маросими ҳаҷ наметавонанд ба Арабистони Саудӣ раванд.
Инчунин ба зойирини хориҷӣ лозим аст, ки натиҷаи манфии тест ба COVID-19-ро, ки на пештар аз 72 соат то сафар гирифта шудааст, пешниҳод намоянд.
Дар соли 2016 Тоҷикистон низ маҳдудидияти сину сол ҷорӣ карда буд, ки шаҳрвандони аз 40-сола пойин ба квотаҳои додаи Вазорати умури ҳаҷ ва умраи Арабистони Саудӣ дохил карда намешуданд.
Ёдовар мешавем, ки соли 2020 дар робита ба пандемияи коронавирус Арабистони Саудӣ ҳаҷ барои зойирини берун аз қаламрави кишварашро бекор карда, инчунин шумораи онҳоро то 1 ҳазор нафар кам карда буд. Дар соли гузашта он то 60 ҳазор боло бурда шуд, вале зойирини кишварҳои хориҷӣ ҳаққи адои маросими ҳаҷро надоштанд.
Пеш аз пандемия ҳамасола ҳудуди 6 ҳазор шаҳрванди Тоҷикистон барои адои фаризаи ҳаҷ ба Арабистони Саудӣ сафар мекарданд.
