Раёсати ислоҳи ҷазои ҷиноии Вазорати адлияи Тоҷикистон аз пайвандони зиндониҳо хостааст, ки барои нигаҳдории хӯрокҳои зудвайроншаванда ба зиндон яхдон биоранд.
10-уми июни соли 2022 дар шабакаҳои иҷтимоӣ аксе аз назди бинои зиндони нав дар шаҳри Ваҳдат нашр шуд, ки дар он дида мешад, наздикону пайвандони зиндониёни кишвар бо ҳузури кӯдакон зери офтоби сӯзон интизори дохил шудан ба назди зиндониён мебошанд.
Пеш аз ин ҳам дар моҳи августи соли 2021 Аздо тв хабар дода буд, ки зарфи беш аз ду ҳафтае, ки маҳбусон ба зиндони нав интиқол ёфтаанд, аз оддитарин шароити будубош дар зиндон маҳрум ҳастанд. Онҳо на оби тозаи ошомиданӣ доранд ва на хӯроки маъмулие, ки шикамашонро сер кунанд.
Шуҳрати Раҳматулло, писари зиндонии сиёсии тоҷик Раҳматуллоҳи Раҷаб, ки дар ин зиндон нигаҳдорӣ мешавад, мепурсад, дар гузашта “он яхдонҳое, ки аз тарафи ташкилоти хоричӣ кумак карданд, куҷо шуданд?”
Он замон ҳам пайвадони маҳсубонро маҷбур мекарданд, ки қариб тамоми лавозимоти заруриро барои онҳо муҳайё кунанд. Инак бо гузашти қариб як сол ҳамоно масъулини зиндон аз наздикону пайвандони зиндониён мехоҳанд, ки аз коғази ҳоҷатхона то яхдону “кондиционер” зиндонро таъмин кунанд.
Гуфта мешавад, тибқи талаботи қонунгузорӣ ва риояи сохтмони биноҳои дорои хусусияти ҷамъиятӣ бояд ки барои зоирон ва корафтодаҳо шароити мусоид барои интизор шудан фароҳам оварда шавад, аммо дар ин акс дида мешавад, то кунун дар назди ин зиндони нав на маконе махсус барои пазироӣ аз меҳмонону корафтодаҳо сохта шудааст ва на ҷое барои муваққатан нигоҳ доштани дастовез (дачка) ва озуқаворие, ки мардум мехоҳанд ба зиндониён бирасонанд.
