19-уми июли соли ҷорӣ дар қароргоҳи СММ Мубоҳисаи зери унвони “Лаҳзаи табиат” дар мавзӯъҳои “ҳифзи муҳити зист аз таҳдидҳо ва чолишҳои имрӯза” баргузор шуд.
Бино ба гуфтаи Вазорати корҳои хориҷаи Тоҷикистон дар ин нишаст ҳайати Тоҷикистонро раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерилизода Баҳодур раҳбарӣ мекард.
Гуфта мешавад, ин чорабинии мазкур бо ташаббуси Раиси иҷлоси 76-уми Маҷмаи Умумии Созмони Милали Муттуҳид Абдулло Шоҳид дар сатҳи баланд баргузор шудааст.
Дар ин чорабинӣ “Раиси иҷлоси 76-уми МУ СММ А.Шоҳид, Дабири кулли СММ А. Гутерриш ва Раиси Шӯрои иқтисодӣ ва иҷтимоии СММ К. Келапиле иштирок ва суханронӣ карда, аҳаммияти баргузории чорабинии мазкурро дар мубориза ба таъсири тағйирёбии иқлим ва ҳифзи муҳити зист муҳим арзёбӣ карданд.”
Ба иттилои Вазорати корҳои хориҷии Тоҷикистон, раҳбари ҳайати намояндагии кишвар Шерилизода Баҳодур дар нишасти мазкур “ба ҳайси панелист дар сегменти аввали чорабинӣ таҳти унвони “Коркарди вокунишҳои ҳамоҳангшудаи низоми муштарак дар мубориза бар зидди чолишҳои ҷаҳонӣ” суханронӣ ва се таҳдиди умдаи ҷаҳонӣ, аз ҷумла тағйирёбии иқлим, аз даст додани биогуногунӣ ва ифлосшавии муҳити зистро зикр кард. Мавсуф зимни суханронии худ аз таъсири тағйирёбии иқлим ба вазъи экологӣ дар Осиёи Марказӣ, ба хусус Тоҷикистон ва чораҳои андешидашудаи кишвар дар ин маврид гуфт.”