Мақомоти интизомии кишвар Муслим Шерзамонов, бародари Алим Шерзамонов, муовини раиси Паймони миллии Тоҷикистонро, ки чанд рӯзи пеш ба 18 соли маҳкум шуда буд, аз Хоруғ ба Душанбе интиқол доданд.
Як манбаъ бо шарти зикр нашудани номаш ба Azda tv гуфт, шаби 7-ум ба 8-уми августи соли ҷорӣ Муслим Шерзамоновро ҳамроҳи 21 маҳбуси дигар аз боздоштгоҳи муваққатии шаҳри Хоруғ ба Душанбе интиқол доданд.
Гуфта мешавад, интиқоли маҳбусон аз Хоруғ ба дигар манотиқи кишвар шабона сурат мегирад.
Ба гуфтаи манбаъ, наздикони боздоштшудаҳо дар Хоруғ гуфтаанд, дар боздоштгоҳи муваққатии шаҳри Хоруғ аз сабаби зиёд боздошт кардани одамон вазъ хеле тоқатфарсост ва ҳама мехоҳанд, ки ҳарчи зудтар парвандаи боздоштшудаҳо баррасӣ шуда, ҳукми сафед кардан ва ё зиндонӣ шуданашон эълон шавад ва онҳоро ба дигар ҷой интиқол бидиҳанд.
Давоми чанд ҳафтаи ахир даҳҳо фаъоли маданӣ аз зодагони Вилояти Мухтори Кӯҳистони Бадахшон боздошт гардиданд ва баррасии парвандаи баъзе аз онҳо як ҳафта ҳам тӯл накашида, барои солҳои тӯлонӣ маҳкум ба зиндонӣ шуданд.
Ёдовар мешавем, ки мақомоти кишвар Муслим Шерзамоновро 12-уми июни соли ҷорӣ дар пайи як амалиёти махсус боздошт карда, 29-уми июл барои 18 сол аз озодӣ маҳрум карданд.
Мақомот Муслим Шерзамоновро дар ташкили ошӯбҳо дар Рӯшону Хоруғ муттаҳам кардаанд, вале худи Шерзамонов ин иттиҳомотро рад мекунад.
Аммо муовини раиси ПМТ Алим Шерзамонов дар суҳбат бо Azda tv боздошти бародараш Муслим Шерзамоновро “қасос гирифтан мақомот аз худи ӯ” номида буд. Чун мақомоти кишвар дар сарзадни даргириҳои Хоруғу Рӯшон Алим Шерзамоновро низ гунаҳкор эълон кардааст.
