Масъулини Тоҷикистон ва Созмони Амният ва Ҳамкории Аврупо (САҲА) дар шаҳри Душанбе рушди муносибатҳои худро баррасӣ карданд.
Бино ба иттиллои сомонаи Вазорати корҳои хориҷии Тоҷикистон 12-уми августи соли 2022 “муовини вазири корҳои хориҷии Ҷумҳурии Тоҷикистон Музаффар Ҳусейнзода иҷрокунандаи вазифаи роҳбари Дафтари барномаҳои САҲА дар Душанбе Теа Ҷалиашвилиро ба ҳузур пазируфт.”
Ба қавли манбаъ, “дар рафти мулоқот ҷонибҳо масъалаҳои рушди муносибатҳои Тоҷикистону САҲА-ро дар чаҳорчӯби се ченаки ҳамкорӣ – низомӣ-сиёсӣ, иқтисодӣ-муҳитизистӣ ва инсонӣ мавриди баррасӣ қарор доданд.”
Тоҷикистон 30 сол аст узви Созмони Амният ва Ҳамкории Аврупо мебошад, вале дар се даҳсола ягон маротиба САҲА интихоботҳои баргузоршуда дар Тоҷикистонро пурра демократӣ ва тибқи меъёрҳои қабулшуда дар ин созмонро эътироф накардааст.
