Имрӯз дар шаҳри Душанбе, пойтахти Тоҷикистон нишасти байналмилалие зери унвони “Ҳамкории байналмилалӣ ва минтақавӣ оид ба амният ва мудирияти сарҳад ҷиҳати муқовимат ба терроризм ва пешгирӣ аз ҳаракати террористҳо” ба кори худ поён медиҳад.
Рамзҳои хос, яъне тарс додани мардум ва таҳмил кардани фазои тарсу ҳарос дар ҷомеа ва ба хусус байни фаъолони ҷомеаи шаҳрвандӣ ва паёмҳои равшан ба хориҷ, яъне таҳаммул накардани афкори ғайр новобаста аз мухолифу мувофиқ ва тарраҳум накардан ба фаъолони ҷомеаи шаҳрвандӣ ва дар умум озодаҳои кишвар тафсир мешаванд.
Мақомоти корҳои дохилӣ, прокуратура ва Суди олӣ бо машварати Эмомалӣ Раҳмон парвандаи Далери Имомалиро сохтанду бофтанд ва дар муддати беш аз чор моҳ кашол дода, то имрӯз расонданд. Ҳар чанд тибқи қонунгузориҳои амалкунанд мақомоти судӣ ҳамчун як шохаи алоҳидаи ҳокимият амал мекунанд, вале амалан судҳо дар Тоҷикистон тобеи ҳукумати иҷроия ва дар раъси он раиси Ҳукумати Тоҷикистон сахт вобаста мебошанд.
Ба иборати дигар, аз баски дар Тоҷикистон тамоми судяҳро худи Эмомалӣ Раҳмон дар мансабҳои қазоӣ таъйин ва аз мақомашон барканор мекунад, дар давоми ин се даҳсолаи ахир ин амр низ дар зеҳни аксари мардум барҷаста шудааст, ки ҳаллу фасли ҳамагуна парвандаҳои пурсару садо, ба хусус парвандаҳои марбут ба фаъолони маданӣ, рӯзноманигорон ва тоҷирони муваффақ тибқи ирода ва хостаҳои Президенти Тоҷикистон баҳогузорӣ мешаванд.
Амруллоҳи Низом, махсус барои Azda tv
