Мақомоти исроилӣ гуфтаанд, ки шаби гузашта аз тариқи замин ба Ғазза ҳамла карданд. Аммо нерӯҳои фаластинӣ иддао доранд, ки ин ҳамла бо шикаст рӯбарӯ шудааст.
Бино ба иттилои расонаҳо, мақомоти исроилӣ эълон карданд, ки ба хотири омодагӣ барои марҳилаҳои баъдии ҷанг дар ҷануби Ғазза “амалиёти маҳдуд”-еро анҷом дода, пас гашта омаданд.
Ҳамзамон дар як наворе, ки мақомоти исроилӣ дар расонаҳо ва шабакаҳои иҷтимоӣ нашр кардаанд, дида мешавад, ки чанд адад тонк, зиреҳпӯш ва дигар мошинҳои низомь деворҳои бетонӣ ва симхории атрофи Ғаззаро убур карда, зери ҳимояи гулулаборони тупхонаӣ ба ҷануби Ғазза ворид шудаанд.
Исроил иддао кардааст, ки дар рафти баргузории ин амалиёти маҳдуд даҳҳо адад нуқтаҳои муҳим, аз ҷумла бархе тунелҳои нерӯҳоии Ҳаракати муқовимати исломии Фаластин (ҲАМОС) ва дигар нерӯҳои фаластиниро мавриди ҳадаф қарор додааст.
Аз сӯи дигар, бархе расонаҳо баакси иддаои мақомоти исроилӣ гуфтаанд, ки нерӯҳои исроилӣ дар вақти баргузории ҳамлаҳои заминӣ ба Ғазза қасд доранд зери назорати амрикоиҳо бо сар додани газ ба тунелҳо дар Ғазза ба нерӯҳои фаластинӣ ҳамла кунанд.
Аз сӯи дигар, раҳбарони нерӯҳои фаластинӣ ҳам борҳо гуфтаанд, ки барои ҳар гуна сенаряҳои эҳтимолӣ ва ҳамлаҳои заминӣ ба Ғазза аз пеш омода шудаанд. Дар сурати ҳамлаи заминӣ шикасти бузурге дар интизори нерӯҳои исроилӣ хоҳад буд. Инчунин нерӯҳои ҲАМОС имрӯз эълон карданд, ки як чархболи низомии Исроилро дар осмони Ғазза мавриди ҳадаф қарор доданд.
Инчунин дар давоми ин 20 рӯзи ҷанг бархе коршиносони низомӣ аз дохили Исроил, кишварҳои Амрико, Фаронса, Бритониё ва Олмон ҳам борҳо ҳушдор додаанд, ки ҳаргуна амалиёти заминии низомӣ бар зарари нерӯҳои исроилӣ анҷом хоҳад шуд.
Гуфта мешавад, субҳи 7-уми октябри соли ҷорӣ нерӯҳои фаластинӣ ба чанд шаҳрак ва пойгоҳҳои ҳарбии нерӯҳои исроилӣ дар атрофи Ғазза ҳамла карда, даҳҳо нафар аз афсарону сарбозони исроилиро ба асорат гирифтанд. Асри ҳамон рӯз Исроил ҳамлаҳои худ ба Ғаззаро оғоз кард ва то ҳол идома доранд.
Бар асоси оморҳои расмӣ, дар натиҷаи ҳамлаҳои Исроил ба Ғазза зиёда 7 ҳазор нафар кушта ва беш аз 17 ҳазору 440 каси дигар захмӣ шудаанд. Мақомои исроилӣ омори талафоти худро ба пуррагӣ нашр накардаанд, вале бар асоси бархе гузоришҳо, ҳудуди 1500 нафар кушта ва наздик ба 3200 нафар захмӣ доранд. Дар бораи ҳаҷми хисороти молӣ аз ду ҷониб то ҳол гузоришҳои дақиқе ироа нашудааст.
