Ҳуқуқ

Бобоназарова: Тайёрам дар ҳайъати тафтишот ҳодисаи ҳамла ба Сайфуллозодаро таҳқиқ кунам

Ойниҳол Бобоназарова, ҳуқуқшиноси шинохтаи кишвар аз мақомот хостааст, ки ҳодисаи лату кӯби рӯзноманигори 70-сола Ҳикматулло Сайфуллозодаро дар зиндон таҳқиқ кунад.

Ойниҳол Бобоназарова, фаъоли ҷомеаи шаҳрвандӣ ва раҳбари Созмони "Перспектива +" таъкид кардааст: "Органҳои дахлдор ҳатман ба зуддӣ ин ҳодисаро бояд тафтиш намоянд, агар ин ҳақиқат бошад, гунаҳгорон бояд ҷазои сазовор гиранд."

Хонум Ойниҳол Бобоназарова пешниҳод кардааст: "Хуб мешуд ба ҳайъати гурӯҳи тафтишот аз ҷомеаи шаҳрвандӣ низ нафаре дохил мешуд. Тайёрам, ки ба ин гурӯҳ дохил шавам."

Ин ҳуқуқшиноси маъруф ва фаъоли ҷомеаи шаҳрвандӣ дар идома гуфтааст, "агар ба ҳайъати тафтишот маро дохил кунонанд, агар ин ҳақиқат дурӯғ бошад онро шахсан ҳамчун овозаи бардурӯғ паҳн менамоям ва аз паҳнкунандагони он талаб менамоям, ки ба чунин дурӯғгӯиҳо хотима бахшанд."

Ҳафтаи гузашта Ҳикматуллоҳ Сайфуллозода, рӯзноманигори тоҷик ва маҳбуси сиёсӣ бар асари як ҳамла дар зиндони шаҳри Ваҳдат аз ноҳияи сараш сахт зарба хӯрда, бар асари он дар қисми беҳдоштии зиндон бистарӣ шудааст.

Бино ба маълумоти ҳамсари Ҳикматулло Сайфуллозода, Фароғат Сангинова ҳамлагар Турсунов Аслиддин як зиндонӣ, ки бо ҷурми одамкушӣ маҳкум ба зиндон шудааст, дар шуъбаи санитарии зиндон ба Сайфуллозода ҳамла карда, бо чойники оҳанин ба сараш зарба мезанад. Дар натиҷа Сайфуллозода аз ноҳияи сараш осеб хӯрда, пирамарди 70-сола дар шӯъбаи беҳдоштии зиндон як ҳафта бистарӣ мегардад.

Гуфтанист, Турсуновро барои 10 рӯз ба шӯъбаи бемории зиндон ҷойгир мекунанд. Ба гуфтаи хонум Сангинова ҳамлагарро ҳадафмандона ба ин шӯъба овардаанд, то ки Сайфуллозодаро латукӯб кунад. Ӯ афзуд, ки ин ҳодиса тарҳрезӣ шуда ва ба қазияи амалиёти маҳви физикии Маҳмадалӣ Ҳаит шабоҳат дорад.

Инчуни дар сӯҳбат бо Аздо тв Сангинова гуфт, ҳамсараш қаблан дар шӯъбаи беҳдоштии зиндон бо сабаби бемории қалбаш бистарӣ буд ва бояд табобат гирифта аз шӯбаи санитарӣ ҷавоб мешуд. Аммо тӯли як ҳафтаи ахир Сайфуллозода бо пайвандонаш тамоси телефонӣ надошт.

Сангинова баъд аз расонаӣ шудани хабари лату кӯби ҳамсараш дирӯз ба зиндони Ваҳдат рафта ба шӯъбаи беҳдоштии он роҳ намеёбад. Масъулони зиндон ба ӯ гуфтанд, ки ба шавҳараш ҳеҷ ҳамлае сурат нагирифта ва ӯ сиҳату саломат аст.

"Дар назди бинои зиндон пофишорӣ кардам ва ба зиндонбонҳо гуфтам, то шавҳарамро набинам ба ҳеҷ куҷо намеравам. Баъд аз 20 дақиқа аз рақами муассиса шавҳарам занг заданд ва ҳодисаро аз худашон пурсидам. Ҳоҷӣ (Ҳикматулло Сайфуллозода) ба ман нақл карда гуфт, ҳамлагар одамкӯш буда, ними шаб ба ӯ дар "санчаст" ҳуҷум карда, бо чойники оҳанин ба сараш мезанад...", - афзуд Фароғат Сангинова.

Ин ҳам дар ҳолест, ки созмони Хабарнигорони Бидуни Марз "RSF" бо баёнияе, ки рӯзи 9 сентябр нашр шуд аз ҳукумати Тоҷикистон хоста буд, Ҳикматулло Сайфуллозодаро афв кунад. Чунки "Сайфуллозода аз соли 2015 дар зиндон аст ва ҷонаш дар хатар аст."

Ҳикматуллоҳ Сайфуллозода, собиқ сардабири ҳафтаномаи Наҷоти Ҳизби наҳзати исломии Тоҷикистон ва яке аз таҳлилгарони шинохтаи кишвар айни замон дар бинои зиндони нав дар шаҳри Ваҳдат нигаҳдорӣ мешавад.

Гуфта мешавад, Ҳикматуллоҳ Сайфуллозода, собиқ узви Раёсати олии Ҳизби наҳзати исломии Тоҷикистон бо иттиҳоми сохтаи мақомот 6 сол пеш боздошт ва барои 16 сол аз озодӣ маҳрум карда шуд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Ҳуқуқ

Ҳуқуқ

ҲНИТ: Қатли мухолифин дар зиндон ба дӯши Раҳмон аст

Ҳуқуқ

КШНГЗ ҳукми додгоҳ нисбати Иззат Амонро маҳкум кард

Ҳуқуқ

Қатли бераҳмонаи ду зиндонӣ дар шаҳри Ваҳдат

Ҳуқуқ

Иззат Амон ба 9 соли зиндон маҳкум шуд