Бонки миллии Тоҷикистон пас аз суқути қурби рубли русӣ дар бозорҳои ҷаҳонӣ арзиши пули миллӣ-сомониро дар баробари рубли русӣ 7,5 фоиз боло бурд.
Бонки миллии Тоҷикистон 21-уми декабри соли 2022 қурби рубли русӣ дар баробари пули миллӣ-сомониро 7,5 фоиз пойин оварда, арзиши 1 рубли русиро 0,1440 сомонӣ таъйин кард.
Ба ин тартиб акнун дар бозорҳои расмии арзҳои хориҷӣ дар Тоҷикистон ҳангоми харид барои 1000 рубли русӣ 144 сомонӣ ва 40 дирам муайян шудааст.
Аммо дар бонкҳои тиҷоратии кишвар ин рақамҳо яксон нестанд ва дар вақти хариду фурӯши рубли русӣ нархҳо фарқ мекунанд: Барои мисол, дар Ориёнбонк 1000 рубли русӣ вақти харид 140 сомонӣ ва ҳангоми фурӯш 146 сомонӣ, дар Амонатбонк харид 140 ва фурӯш 142 сомонӣ, дар Тавҳидбонк харид 137,70 ва фурӯш 144,40 сомонӣ ва аммо дар бокни Эсхата бошад, харид 141 сомонӣ ва фурӯши он 145,50 сомонӣ таъйин шудааст.
Бонки миллии Тоҷикистон бо вуҷуд пойин бурдани арзиши рубли русӣ қурби евро ва доллари амрикоиро дар баробари пули миллӣ-сомонӣ бетағйир гузашта, айни замон нархи 1 евро 10 сомониву 83 дирам ва 1 доллар 10 сомониву 21 дирам таъйин шудаанд.
Гуфта мешавад, шуруъ аз 7-уми декабри соли ҷорӣ қурби рубли русӣ дар биржаҳои ҷаҳонӣ якбора арзиши худро аз даст дод ва дар муқобили доллар ва евро ва дигар арзҳои хориҷӣ ба шиддат суқут кард ва ин раванд то дирӯз идома дошт.
