20.9 C
Dushanbe

Боздошти Мамадсултон Мавлоназарови 72-сола

Мамадсултон Мавлоназарови 72-сола, ки дар шабакаҳои иҷтимоӣ бо номи Муҳаммади Султон маъруф аст, рӯзи 16-уми июн аз ҷониби маъмурони интизомӣ боздошт шудааст. Сабаби боздошт ва ба куҷо бурдани ӯ то ҳол маълум нест.

Пайвандонаш дар суҳбат бо Радиои Озодӣ гуфтаанд, ки Мавлоназаровро субҳи панҷшанбе 9 намояндаи мақомот, ки баъзе дар тан либоси милиса доштаанд, аз ҷойи хобаш бардошта, пойи бараҳна ба самти номаълум бурдаанд. Ҳатто ин пирамардро нагузоштаанд то пойафзолашро пӯшад.

Ба гуфтаи пайвандонаш онҳо ба Шуъбаи корҳои дохилӣ, Додситонӣ ва Идораи амнияти ноҳияи Синои шаҳри Душанбе муроҷиат кардаанд, аммо ин ҳама сохторҳо аз вуҷуди ӯ дар ин ниҳодҳо изҳори бехабарӣ кардаанд.

Чанде пеш худи Муҳаммади Султон дар саҳифаи Фейсбукаш бо нашри чанд акс навишта буд, ки моҳи апрел кормандони мақомот кӯшиш кардаанд, ӯро аз хонааш дар маҳаллаи 101-уми Душанбе маҷбурӣ ба бозпурсӣ баранд.

Мамадсултон Мавлоназаров 72 сол дошта, зодаи Вилояти Мухтори Кӯҳистони Бадахшон аст.

Ба иттилои Радиои Озодӣ ӯ дар солҳои 70-ум асри гузашта дар рӯзномаи “Комсомоли Тоҷикистон” кор кардаааст.

Дар Кумитаи давлатии амнияти миллӣ низ кор карда рутбаи полковникро дорад.

Дар ҳоли ҳозир ӯ бознишаста буда, дар шабакаҳои иҷтимоӣ пайваста рафтори мақомотро танқид мекард ва дар бораи ҳодисаҳои Бадахшон низ менавишт.

Дар яке аз навиштаҳои охираш, пас аз кофтукови манзили зисташ Саймуъмин Ятимовро танқид намуда, гуфта буд, ки “Тамоми қонунҳои хуқуқи инсонро зери по карда, хадамоти академик С.Ятимов таъқиботи рӯйиросту ғайрсудиро, ки яқин солҳои пурдаҳшати 37-ум ва Берияро хотиррасон менамоянд, “қаҳрамонона” идома медиҳад”.

То ҳол маълум нест, ки ин пирамарди 72-соларо барои танқидҳояш аз Саймуъмин Ятимов боздошт кардаанд ё навиштаҳояш дар бораи ҳодисаҳои Бадахшон. Аммо ба назари таҳлилгарон мақомоти Тоҷикистон ба шикори зодагони Бадахшон гузашта, ҳар нафароре, ки аз ҳукумат танқид мекунад ё каме миёни мардум маъруф аст, боздошту зиндонӣ мекунад ё бо ҳар баҳонае ба қатл мерасонад. Тасдиқи гуфтаҳои боло ҳодисаҳои ахири Бадахшон аст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Боздошти беш аз 20 нафар дар парвандаи ҳамла ба Крокус

Дар пайи ҳамлаи хунин ба “Крокус Сити Ҳолл”-и Красногорски...

Нақшаи даъвати баҳории сарбозон пурра иҷро шуд

Вазорати мудофиаи Тоҷикистон хабар дод, ки нақшаи даъвати баҳории ҷалби сарбозон ба Артиш дар кишвар рӯзи 22-уми майи соли ҷорӣ 100% иҷро шуд.

Мақомот мехоҳанд бародари як мухолифи тоҷикро аз хонааш берун кунанд

Мақомоти ноҳияи Зафаробод мехоҳанд замини як мухолифи тоҷик Салим Султонзодаро, ки дар он бародараш хона сохтаасту зиндагӣ мекунад, мусодира кунад.

Мақомот: Занҳо сатр напӯшанду мардҳо ришу мӯйи баланд нагузоранд!

Мақомоти амниятӣ ва интизомии кишвар дар кӯчаву бозорҳо "рейд" гузаронида, масъалаи пешгирӣ аз "либоси ба фарҳанги тоҷикон бегона"-ро сахт гирифтаанд.