24.9 C
Dushanbe

Буҷет иҷро нашуд. Чаро корхонаҳои бузург андоз намесупоранд?

Бино ба омори ниҳодҳои молии Тоҷикистон буҷети имсолаи кишвар аз ҳисоби пардохт нашудани андоз аз ҷониби андозсупорандагони бузурги кишвар пурра иҷро нашудааст.

Гуфта мешавад давоми 9 моҳи гузашта ба буҷети давлатии Тоҷикистон аз ҳисоби ҳама сарчашмаҳои воридот 379,7 млн. сомонӣ камтар маблағ ворид шудааст.

Вазири молияи Ҷумҳурии Тоҷикистон Файзиддин Қаҳҳорзода дар ҷаласаи Парлумон рӯзи 5 ноябр гуфт, ки дар 9 моҳи соли равон ба буҷети ҷумҳурӣ 7,5 миллиард сомонӣ ворид гардид, ки аз нақшаи пешбинишуда 7,9 дарсад кам мебошад.

Вазири рушди иқтисод ва савдои Тоҷикистон Завқӣ Завқизода сабаби иҷро нагардидани як қисми буҷети давлатиро ба вазъияти пандемия, додани сабукиҳои андозӣ, қарзӣ ва гумрукӣ ба истеҳсолкунандагони ватанӣ, дастгирии қишри осебпазири аҳолӣ ва ғайра рабт додааст.

Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода сабаби иҷро нашудани буҷети давлатро ба пардохт нагардидани андоз аз ҷониби корхонаҳои бузурги кишвар рабт додааст.

Ба буҷети ҷумҳуриявӣ аз ҳисоби корхонаҳои мазкур (ба истиснои «Амонатбонк» – иҷро 121,8 фоиз) 689,0 млн. сомонӣ ворид шуд, ки нисбат ба нақша 392,0 млн. сомонӣ кам мебошад, – гуфтааст Давлатзода.

“Бинобар сабаби аз тарафи баъзе аз субъект­ҳои хоҷагидор сари вақт ва дар ҳаҷми пурра пардохт нагардидани андозҳои ҳисобшуда, бақияи қарзи андоз афзоиш ёфта, то 1 октябри соли 2020 -ум 1 миллиарду 21,0 млн. сомониро ташкил дод, ки нисбат ба 1 январи соли 2020 -ум 440,0 млн. сомонӣ зиёд мебошад”, – менависад нашрияи “Садои мардум” аз қавли Давлатзода.

Қарзи андоз асосан аз ҳисоби ҶСК НОБ «Сангтӯда-1» 115,6 млн. сомонӣ, ҶСК НБО «Роғун»-43,2, КВД «Ширкати Алюминийи Тоҷик» – 15,0, ҶСК «Тоҷиктелеком» ва корхонаҳои тобеи он – 25,4, фурудгоҳҳо ва ширкатҳои ҳавопаймоӣ 71,5 млн. сомонӣ афзоиш ёфтааст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Кумаки 141 миллионии ИА ба Тоҷикистон

Иттиҳоди Аврупо эълон кардааст, ки зиёда аз 140 миллион евро ба Тоҷикистон кумак мекунад.

Рушди беш аз 8%-и иқтисоди Тоҷикистон

Гузоришгарони Бонки ҷаҳонӣ мегӯянд, рушди иқтисоди Тоҷикистон дар 16 моҳи ахир беш аз 8% тавсеа ёфтааст.

Баррасии ҳамкориҳои Тоҷикистон ва Иттиҳоди Аврупо

Мақомоти боломақоми Тоҷикистон ва Иттиҳоди Аврупо дар бораи ҳамкориҳои дирӯз ва имрӯзи худ гуфтугӯ карданд.

Шикояти мардум аз беобӣ дар Тоҷикистон

Бархе сокинони шаҳри Бохтар, маркази вилояти Хатлон мегӯянд, ки чор моҳ боз мардум аз беобӣ азият мекашанд ва касе дар вилоят ба доди онҳо намерасад.