Дар як таркише дар Арабистони Саудӣ, 4 нафар маҷрӯҳ шудаанд

Хабаргузории Ал-Ҷазира аз қавли Вазорати корҳои хориҷии Фаронса хабар медиҳад, ки имрӯз, чаҳоршанбе ҳангоми маросими ёдбуди хотимаи Ҷанги якуми ҷаҳон, дар як қабристони ғайримусалмонон дар шаҳри Ҷиддаи Арабистони Саудӣ таркиш ба амал омада, дар паи ин ҳамла чанд нафар маҷрӯҳ шудаанд. Ёдбуди хотимаи Ҷанги якуми ҷаҳон ба 11 ноябр рост меояд.

Вазорати корҳои хориҷии Фаронса гуфта, ки ҳангоми таҷлил аз солгарди хатми Ҷанги якуми ҷаҳон дар қабристони ғайримусалмонон дар Ҷидда, консули ин кишвар бо чанд дипломати дигар ширкат доштаанд. Ин қабристон субҳи имрӯз ҳадафи ҳамла қарор гирифта, бар сари таркиш чанд тан ҷароҳат бардоштааст.

Хабарнигори Ал-Ҷазира дар Париж гуфт, ки вазорати умури хориҷаи Фаронса ишора карда, ки ҳангоми таркиш бо норинҷаки дастӣ, ки аз пушти девори атрофи қабристон партофта шуда буд, ҳадди аққал ду нафар маҷрӯҳ шуданд. Дар ин маросим дар баробари консули Фаросна як қатор консулҳои хориҷӣ аз кишварҳои дигар низ, ҳузур доштаанд.

Париж ин ҳамларо маҳкум карда онро "ҳамлаи ноҷавнмардона, ки ба ҳеҷ ваҷҳ тавҷеҳ намешавад”, унвон кардааст. Ҳамзамон аз мақомоти Арабистони Саудӣ даъват кардаанд, ки ба ин ҳамла ҳарчи бештар равшанӣ андозанд ва ҷинояткоронро муайян кунанд. То ҳол аз ҷониби Арабистони Саудӣ дар бораи ин ҳодиса изҳори назаре нашудааст.