Ҷорӣ шудани маҳдудиятҳо дар реҷаи интиқоли нерӯи барқ ба сокинон ва дӯкондорон дар Конибодом мардумро сахт нигарон кардааст.
“Настоящее время” бо нашри як гузорише дар ин бора аз қавли сокинони маҳаллӣ ва соҳибкорони ноҳия Конибодом навишта, ки ҷорӣ шудани маҳдудиятҳо дар реҷаи интиқоли нерӯи барқ онҳоро сахт нигарон ва зиндагиву корҳои тиҷоратӣ ва ҷамъиятии онҳоро мушкил сохтааст.
Сокинон мегӯянд, ки дар давоми як моҳи ахир ҳамеша се-чор маротиба дар рӯз нерӯи барқи хонаву корхона ва мағозаҳои онҳо қатъ карда мешавад, онҳо аз ин маҳдудият хеле зиёд зарар мебинанд.
Ба гуфтаи онҳо, агар аз як тараф қатъ кардани интиқоли нерӯи барқ ба кори ҳамагуна таҷҳизоти электронии онҳо таъсири манфӣ расонад, аз сӯи дигар, дар бисёр вақтҳо иқтидори нерӯи барқи истифодашаванда ҳам хеле заиф мебошад, то ҳадде, ки хеле аз таҷҳизоти барқӣ дуруст рӯшан намешаванд.
Гуфта мешавад, мақомоти ширкати “Барқи тоҷик” иллатҳои аслии ҷорӣ шудани ин “лимит” ё маҳдудият дар реҷаи интиқоли нерӯи барқ ба сокинонро пурра шарҳ надодаанд. Дар Конибодом ба расонаҳо гуфтанд, ки қатъи нерӯи барқ ба хотири таъмир ва ё “корҳои профилактикӣ” ва дастур аз боло сурат мегирад.
Тоҷикистон ба кишварҳои Узбекистону Қирғизистон ва Афғонистон нерӯи барқ мефурӯшад, вале ҳанӯз маълум нест, ки оё ин маҳдудиятҳо ба хотири зиёд кардани фурӯши барқ ба хориҷи кишвар аст ва ё ин, ки ин амр дар Конибодом иллат ва сабабҳои дигаре ҳам дорад?
