Дар Тоҷикистон телевизиони нави "Илм ва табиат" ба кор оғоз мекунад

Дар таърихи 25 августи соли ҷорӣ Эмомалӣ Раҳмон дар бораи тасдиқи оиннома ва сохтори шабакаи навтаъсиси муассисаи давлатии телевизиони “Илм ва табиат”, ҳамчунин шумори воҳиди кории он қарор ба имзо расонид.

Гуфта мешавад, дар шабакаи нави телевизиони “Илм ва табиат” 87 ҷойи корӣ ва ҳайати хизматрасонии техникӣ таъсис дода мешавад. Ҳукумати Тоҷикистон ба Кумитаи телевизиону радио ва Кумитаи сармоягузорӣ ва идораи амволи давлатӣ дастур дода, ки дар муддати шаш моҳ масоили марбут ба таъмини шабака бо бино, воситаҳои нақлиёт, таҷҳизот ва дигар асбобу лавозими заруриро ҳаллу фасл намоянд.

Маблағгузорӣ ба шабакаи телевизионии аз ҳисоби буҷети ҷумҳуриявӣ ва маблағҳои махсуси худи муассиса роҳандозӣ хоҳад шуд.

Ҳамчунин Вазорати молия вазифадор шуда, ки дар буҷети ҷумҳуриявӣ маблағ барои пардохти хароҷот (музди меҳнат ва суғуртаи иҷтимоӣ)-и 87 воҳиди кориро пешбинӣ кунад.

Гуфта мешавад, дар шабакаи мазкур барномаҳо бо забонҳои тоҷикӣ ва хориҷӣ 24 соат дар як шабонарӯз пахш мешаванд.

Бино ба иттилои Кумитаи телевизион ва радиои Тоҷикистон дар кишвар 13 шабакаи телевизиони давлатӣ ва 35 шабакаи телевизиони хусусӣ фаъолият мекунад.Дар назар аст, боз як як шабакаи нави давлатии телевизиони «Сайёҳӣ ва ҳунарҳои мардумӣ» дар Тоҷикистон роҳандозӣ карда шавад.