Мақомоти Арманистон ва Озарбойҷон дар пасманзари шиддат гирифтани вазъ дар Қарабоғи кӯҳӣ, вазъияти ҳарбӣ эълом карданд. Шаби якшанбе дар ин минтақа даргириҳо миёни сарбозони Арманистон ва Озарбойҷон сурат гирифт.

Вазорати дифоъи Озарбойҷон субҳи рӯзи якшанбе гуфт, ки Арманистон маҳалҳои аҳолинишинро дар самти Тертар, Ҷабраил ва Физулиро тирборон кард ва артиши Озарбойҷон барои ҳимояи аҳолии осоишта ба ҳамлаи ҷавобӣ оғоз кард. Ҷониби Арманистон бошад мегӯяд, ки аввалин шуда Озарбойҷон ҳамла кард. Сарвазири Арманистон Никол Пашинян гуфт, ки Озарбойҷон ҳамлаҳои ҳавоӣ ва мушакиро рӯзи 27 сентябр соати 8:00 ба вақти маҳаллӣ оғоз кард.

Пас аз сар задани задухӯрдҳо, Арманистон дар саросари кишвар ва Озарбойҷон дар якчанд минтақа вазъи ҳарбӣ эълон карданд. Ереван инчунин барои омодагӣ ба ҷанг мардони то 55-соларо сафарбар карданист.

Дар ин даргириҳо даҳҳо нафар кушта шуданд. Ҷониби Арманистон рӯйхати 31 кушташударо нашр кард. Бисёре аз онҳо таваллуди солҳои 2000-2002 ҳастанд, дар рӯйхат номи занон ҳам низ навишта шудааст. Озарбойҷон ҳанӯз шумораи қурбониёнро расман эълон накардааст.

Коршиноси муноқишаи Қарабоғ Эмил Санамян мегӯяд, ки дар даргирии рӯзи якшанбе ҳадди аққал 100 нафар аз ҳарду ҷониб кушта шудааст. Вазири корҳои хориҷии Озарбойҷон Ҷейҳун Байрамов гуфт, ки дар натиҷаи тирборон кардани нуқтаҳои аҳолинишин, шаш ғайринизомӣ кушта шуданд.

Додситонии кулли Озарбойҷон қаблан хабар дода буд, ки панҷ шаҳрванд - сокини деҳаи Гашталти минтақаи Нафталон Элбрус Гурбанов ва чаҳор узви оилаи ӯ, аз ҷониби артиллерияи арманӣ тирборон шуданд. Ҷониби Арманистон хабар дод, ки ду ғайринизомӣ - як зан ва як кӯдак, дар натиҷаи тирбандозии низомиёни Озарбойҷон ба ҳалокат расиданд.

Дар ин авохир Дабири кулли Созмони Милали Муттаҳид Антонио Гутерриш ва чанд давлати дигар, аз ҷумла давлаҳои аврупоӣ аз Арманистон ва Озарбойҷон хостанд то ба ҷанг хотима бахшанд.

Пеш аз пошхӯрии ИҶШС дар соли 1991, Озарбойҷон ва Арманистон ба ҳайати Иттиҳод дохил буданд, аммо муноқишаи Қарабоғ се сол пеш аз он, дар моҳи феврали соли 1988, вақте ки Вилояти Мухтори Кӯҳистони Қарабоғ аз ҷумҳурии Озарбойҷон баромадани худро эълон кард, оғоз ёфт.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.