Мақомот чанд тан аз зодагони Вилояти Мухтори Кӯҳистони Бадахшонро аз 5 то 18 сол равонаи зиндон кардаанд.
Бино ба иттилои “Pamir Daily News”, Комрон Мамадназаров, сокини шаҳри Хоруғ ва яке аз паҳлавонони маъруфи Бадахшон ба 5 соли зиндон маҳкум шудааст.
Гуфта мешавад, Комрон дар мактаби варзишии ВМКБ ба ҳайси мураббии дзюдо ва самбо низ кор кардааст. Ӯро Кумитаи давлатии амнияти миллии Тоҷикистон рӯзи 12-уми июн дар ҷараёни ба ном “амалиёти вижа” дар маҳаллаи “УПД” боздошт карда буд.
Инчунин сокини ноҳияи Роштқалъа Шафтолу Бекдавлатови 64-сола ва Хуҷамир Пирамадови 58-сола, ки ҳарду аъзо ва фаъоли "Комиссияи 44" буданд, суд онҳоро ба 18 солии зиндон маҳкум кардааст.
Ҳамзамон, ба навиштаи Анора Саркорова, рӯзноманигори шинохтаи тоҷик, мақомот ин афроди маҳкумшударо "ба ташкили иттиҳоди ҷиноӣ" (ташкилоти ҷиноӣ) ва гирифтани кӯмаки молӣ аз хориҷи кишвар муттаҳам карда, дар ҷараёни тафтишот зодагони ВМКБ аз дастрасӣ ба вакили дифоъ маҳрум будаанд.
“Pamir Daily News”, ки бештар ахбори ВМКБ-ро пӯшиш медиҳад, пештар низ хабар дода буд, ки Салам Имомназаров, писари шаҳид Имомназар Имомназаров бо ҳукми додгоҳ барои 16 сол равонаи зиндон шудааст.
Гуфтанист, мақомот Салам Имомназаровро моҳи феврали соли ҷорӣ вақте ки аз Туркия ба Тоҷикистон баргашт, дар фурӯдгоҳи Душанбе боздошт карда буданд.
То ҳол маълум нест, ки мурофиаи Комрон Мамадназоров ва Салам Имомназаров дар куҷо ва кадом шароит баргузор шуда, онҳоро ба чӣ ҷурме айбдор кардаанд. Мақомот низ расман ба расонаҳо дар ин бора чизе нагуфтаанд.
Пеш аз ин Анора Саркорова, рӯзноманигори шинохтаи тоҷик хабар дода буд, ки яке аз наздикони Тутишо Амиршоев, ки моҳи ноябри соли гузашта ҳангоми эътирози осоишта дар шаҳри Хоруғ аз сӯи нирӯҳои амниятии Тоҷикистон кушта шуда буд, ба 8 солу 5 моҳи зиндон маҳкум шудааст.
Мурофиаи додгоҳӣ дар Душанбе пушти дарҳои баста сурат гирифта, Тутиё Амиршоев ба зиндони низомаш сахти шаҳри Хуҷанд интиқол ёфтааст.
Тӯтиё Амиршоеви 31-сола, сокини деҳаи Риҷисти ноҳияи Роштқалъаи ВМКБ мебошад. Мақомот ӯро рӯзи 5 марти соли 2022 дар фурӯдгоҳи шаҳри Душанбе вақте, ки мехост ба Маскав парвоз кунад, боздошт карда буданд.
