Дар Фурӯдгоҳи байналмилалии шаҳри Душанбе Президенти Озарбойҷонро Сарвазири Тоҷикистон ва дигар афроди расмӣ истиқбол карданд.
Бино ба иттилои расмӣ, имрӯз, 5-уми апрели соли 2023, Илҳом Алиев, Президети Озарбойҷон бо сафари расмӣ вориди шаҳри Душанбе шуд.
Дар Фурӯдгоҳи байналмилалии шаҳри Душанбе Президенти Озарбойҷонро ҷаноби Қоҳир Расулзода, Сарвазири Тоҷикистон ва дигар афроди расмӣ истиқбол карданд.
Акс аз манбаъҳои боз
Дар ин чорабинии расмӣ Сарвазири Тоҷикистон Қоҳир Расулзода ҳамроҳ ва дар паҳлӯи Президенти Озарбойҷон болои фаршҳои қирмиз ва рангине, ки ба ифтихори қудуми меҳмонон дар замин фарш гардида буд, роҳ мерафт ва ба сифати мизбон дигар афроди расмиро ба меҳмон муаррифӣ мекард.
Акс аз манбаъҳои боз
Инчунин маросими истиқболи расмӣ аз Илҳом Алиев дар назди Қасри миллат “бо гузориши командири қаровули фахрӣ, садо додани сурудҳои миллии ду кишвар, гузаштани сарони давлатҳо аз назди сафи қаровули фахрӣ, арзи эҳтироми меҳмони олимақом ба Парчами давлатии Тоҷикистон, шиносоӣ бо ҳайатҳои расмии ду ҷониб ҷараён гирифта, бо қадамзании мутантан гузаштани ҷузъу томҳои қаровули фахрӣ аз назди сарони ду давлат анҷом ёфт.”
Аммо бархилофи ин, ҳафтаи пеш, дақиқтараш вақте Эмомалӣ Раҳмон ҳамчун Президенти Тоҷикистон 29-уми марти соли ҷорӣ ба вилояти Суғд сафар карда буд, мақомоти амниятӣ ва кумитаи тадорукоти ин сафар маросими истиқболи бошукуҳе ороста буд, ки ҳатто ба раиси вилоят Раҷаббой Аҳмадзода иҷоза надода буданд, ки ба фаршҳо наздик шавад.
Акс аз манбаъҳои боз
Ҷолиб он буд, вақте Эмомалӣ Раҳмон аз фурӯдгоҳ вориди толор гадида, болои фарши сафед қадам мезад, дида мешуд, ки Раҷаббой Аҳмадзода раиси вилояти Суғд пушти гулчанбарҳо пинҳон шуда, ба қадамзаниҳои Эмомалӣ Раҳмон болои фарш дуздида-дуздида тамошо мекард.
Акс аз манбаъҳои боз
Гуфта мешавад, вақте раиси ҷумҳури як давлат ба шаҳру ноҳияҳо ва вилоятҳои кишвараш сафар мекунад, ҳеч гоҳ мақом ва ҷойгоҳе баландтар аз як раиси ҷумҳури кишварҳои дигаре, ки бо сафарҳои расмӣ вориди кишвараш мегарданд, надорад.
Аммо, чиро вақте Эмомалӣ Раҳмон ҳамчун раиси ҷумҳур ба шаҳру ноҳия сафар мекунад, мақомот ва кумитаҳои тадорукоти он сафарҳо дар аксари маврид касеро намегузоранд, ки паҳлӯи вай болои фаршҳо қадам занад, суолест, ки ҳар бинандаеро водор ба андеша мекунад…
Амруллоҳи НИЗОМ, махсус барои Azda.tv
