Муҳоҷират

Як мухолифи тоҷикро дар Русия боздошт карданд

Мақомоти Русия як “блогер” ва “мухолиф”-и 36-солаи тоҷикистониро, ки дар ҷустуҷӯи байналмилалӣ қарор доштааст, боздошт карданд.

Бино ба иттилои расонаҳои русӣ, кормандони шуъбаи кофтукови ҷиноии шаҳри Санкт-Петербурги Русия 20-уми феврали соли ҷорӣ як шаҳрванди Тоҷикистонро тақрибан соатҳои 11:30 дар ҳудуди кӯчаи “Моисеенко”-и ин шаҳр боздошт карданд.

Ба иттилои расонаҳо, боздоштшударо мақомоти Тоҷикистон аз 20-уми июли соли 2020 дар ҷустуҷӯи байналмилалӣ қарор дода будаанд.

Гуфта мешавад, мақомоти Тоҷикистон нисбати ин мард “бо иттиҳоми даъватҳои оммавӣ барои бо роҳи зӯроварӣ сарнагун кардани ҳукумат” ва “барангехтани кинаву адовати миллӣ, мазҳабӣ ва нажодӣ” парванда боз кардаанд.

Ин зодаи Тоҷикистон дар Русия қонунӣ зиндагӣ доштааст. Ӯро ба идораи пулис бурда, мақомоти тоҷикро дар бораи дастгир шуданаш огоҳ кардаанд.

Мақомоти Русия ному насаби ин шаҳрванди Тоҷикистонро фош накардаанд, аммо расонаҳои ин кишвар  аз ӯ “блогер” ва “мухолиф” ном мебаранд.

Azda.tv ҳувияти ин зодаи Тоҷикистонро маълум карда натавонист. Бо пайдо шудани иттилои нав хабар такмил мешавад.

Дар чанд соли охир мақомоти рус дар ҳамдастӣ бо ҳамтоёни тоҷикашон даҳҳо фаъол ва мухолифи режими Эмомалӣ Раҳмонро боздошт ва иҷборан аз хоки Русия ба Тоҷикистон ихроҷ кардаанд, ки аксари онҳо дар кишвар бо шиканҷа рӯ ба рӯ шуда, барои солҳои тӯлонӣ равонаи зиндон гардидаанд.


Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Муҳоҷират

Тоҷикистон

Тазоҳуроти мухолифони Тоҷик дар Олмон

Вокуниши Вазорати корҳои хориҷии Тоҷикистон

Россия

Ба як фаъоли тоҷик дар Лаҳистон паноҳандагӣ надоданд

Муҳоҷират

Афзоиши "шикори" тоҷикбачаҳо дар Русия