Раванди интиқоли 200 зани маҳкумшудаи тоҷик аз зиндонҳои Русия ба Тоҷикистон, ки қаблан мақомоти ду кишвар дар бораи он ба тавофуқ расида буданд, то ҳол оғоз нашудааст.
Дар ин бора Ваколатдор оид ба ҳуқуқи инсон дар Тоҷикистон Умед Бобозода рӯзи 16 июл дар нишасти матбуотӣ хабар дод. Ба гуфтаи ӯ, сабаби асосии ба таъхир афтодани ин раванд иваз шудани Ваколатдори ҳуқуқи инсони Русия ва идома доштани татбиқи қонуни афв дар Тоҷикистон мебошад.
Бобозода гуфт, пас аз таъйини Яна Лантратова ба вазифаи Омбудсмени Русия ба ҷойи Татяна Москалкова, масъала дубора бо ҷониби Русия баррасӣ шудааст. Ба гуфтаи ӯ, роҳбарияти нави ин ниҳод аз ҷузъиёти тавофуқи қаблӣ огоҳ набуда, бинобар ин барои идомаи кор вақт лозим шудааст.
Бо вуҷуди ин, мақомоти Тоҷикистон мегӯянд, ки омодагиҳо барои қабули маҳбусон анҷом ёфтааст. Ба иттилои Ваколатдор, дар муассисаи ислоҳии занонаи шаҳри Норак зиёда аз 200 ҷой барои ҷойгир кардани онҳо муҳайё шудааст.
Ӯ ҳамчунин таъкид кард, ки то анҷоми татбиқи қонуни афв интиқоли маҳбусон оғоз намешавад, аммо ҳамоҳангиҳо бо ҷониби Русия идома доранд ва масъала таҳти назорати мақомоти ду кишвар қарор дорад.
Моҳи январи соли ҷорӣ Омбудсмени вақти Русия Татяна Москалкова гуфта буд, ки чанд зани маҳкумшудаи тоҷик хоҳиши интиқол ба Тоҷикистонро доранд. Баъдтар вай дар ин хусус ба Эмомалӣ Раҳмон нома ирсол кард ва моҳи апрел президенти Тоҷикистон ба интиқоли 200 зани маҳкумшуда розигӣ дод.
Интиқоли маҳкумшудагон ба ватан яке аз масъалаҳое аст, ки солҳои охир пайваста аз ҷониби наздикони онҳо матраҳ мешавад. Ба гуфтаи онҳо, масофаи дур ва хароҷоти зиёди сафар имкони мулоқот бо наздикони дар зиндонбудаашонро маҳдуд кардааст.
