Қудои хабарсози Президенти Тоҷикистон аз вазифаи президенти Федератсияи бокси Тоҷикистон истеъфо дода, ҷои ӯро Мирзоалӣ Комил ишғол кард.
Бино ба иттилои сомонаи Кумитаи олимпии Тоҷикистон, имрӯз, 14-уми ноябри соли 2022 Бег Сабур, сардори Хадамоти алоқаи назди Ҳукумати Тоҷикистон аз мансаби президенти Федератсияи бокси Тоҷикистон истеъфо дод.
Ба қавли манбаъ, ҷаласаи ғайринавбатии интихоботии Конференсияи Федератсияи бокси Тоҷикистон дар Кумитаи миллии олимпии Тоҷикистон, ки имрӯз баргузор шуд, истеъфои Бег Сабур қабул гардида ва Мирзоалӣ Комил низ ба ҳайси президенти ин федератсия интихоб шудааст.
Истеъфо ва барканории қудои Эмомалӣ Раҳмон ҷаноби Бег Сабур аз ин мансаб дар ҳоле садо медиҳад, ки арзу шикоятҳои мардум ва мақомоти андоз ва дигар ниҳодҳои давлатӣ дар чанд соли ахир нисбат ба вай хеле зиёд шудааст.
Гуфта мешавад, Бег Сабур ҳамчун яке аз раҳбарони ниҳодҳои муҳими давлатӣ, ки тибқи қонунгузорӣ фаъолият карданаш ба соҳибкорӣ маҳдуд шудааст, бо сӯиистифода аз мақоми хешутаборӣ бо Эмомалӣ Раҳмон дар баробари доштани мансаби давлатӣ ба сохтони хонаҳои баландошёна ва тиҷорати амволи ғайриманқул низ машғул аст.
Инчунин дар замони раҳбарии Бег Сабур хидматрасонии алоқаи мобилӣ дар Тоҷикистон ва Интернет, ки то омадани вай дар Осиёи Марказӣ ва Афағонистон дар мақоми аввал қарор дошт, ба пойинтарин сатҳи хидматрасонӣ ва гаронтарин нархҳо омада расид.
