Иззат Амон, собиқ ҳомии муҳоҷирон дар Русия ва раҳбар “Маркази Тоҷикон” аз идомаи мурофиаҳои додгоҳӣ даст кашида, онро беҳуда донистааст.
Тавре Радиои Озодӣ аз қавли пайвандони Иззат Амон хабар дод, ки ӯ ба чунин хулоса расида, ки “дигар аз болои ҳукми додгоҳ шикоят намебарад, зеро ба адолати додгоҳӣ ва қонунмандии аҳкоми додгоҳҳои кишвар бовар надорад.”
Даст кашидани Иззат Амон аз идомаи мурофиаҳои додгоҳӣ дар ҳолест, ки 6-уми июн Додгоҳи ноҳияи Исмоили Сомонии шаҳри Душанбе бар болои ҳукми ӯ 6 соли дигар афзуд ва дар маҷмуъ ҳукми ӯ ба 15 соли зиндон расид. Пайвандонаш мегӯянд, онҳо ҳамаҷониба барои пардохти маблағҳои даъвогарон омода буданд, вале додрас шоҳидонро напурсида ҳукмро хонду рафт.
Ба гуфтаи пайвандони Иззат Амон тарзи бархӯрди додрас онҳоро маъюс кард ва аз ин хотир ба дигар зинаҳо шикоят намекунанд, зеро онро бефоида медонанд.
Аз ин пештар наздикони Амриддин Аловатшоев, яке аз чеҳраҳои шинохтаи мардуми Бадахшон, ки аз Русия боздошт ва ба Тоҷикистон истирдод шуда буд, гуфтанд, ки ӯ аз идомаи муҳокимаҳои додгоҳӣ даст кашидааст ва ба зинаҳои болоӣ шикоят намекунад, зеро бовар надорад, ки зинаҳои болои ҳукми ӯро тағйир бидиҳанд.
Мақомоти кишвар охири моҳи апрел Аловатшоевро бо 5 моддаи Кодекси ҷиноятии Ҷумҳурии Тоҷикистон гунаҳкор дониста, барои 18 сол ӯро аз озодӣ маҳрум карданд.
Ва қабл аз инҳо низ Шоҳида Маҳмадҷонова, модари блогери тоҷик Шерзод Маҳмадҷонов маъруф ба “Абдураҳмон 09” низ эълон карда буд, ки агарчи аз ҳукми додгоҳ розӣ нест, вале ба ҳеч зинае шикоят намекунад, чун бефоида аст.
Шоҳида Маҳмадҷоноваро Додгоҳи ноҳияи Исмоили Сомонии шаҳри Душанбе 7-уми апрели соли ҷорӣ бо иттиҳоми “ҷонибдорӣ аз ақидаҳои созмонҳои дар Тоҷикистон мамнуи “Гурӯҳи 24″ ва наҳзати исломӣ” ба 6 соли зиндон маҳкум карда буд. Худи ӯ ва пайвандонаш ба ҳукм додгоҳ розӣ нестанд, вале мегӯянд, шикоят бурдан ба зинаҳои дигари додгоҳӣ ҳукмро тағйир намедиҳад.
