Тоҷикистон дар семоҳаи аввали соли ҷорӣ ба маблағи 19,2 миллион доллар, кумаки башардӯстона дарёфт кардааст. Вазни ин кумакҳо дар умум ҳудуди 10,3 ҳазор тоннаро ташкил додааст.
Ин омор нисбат ба моҳҳои январ-марти соли 2022 аз рӯи арзиш 2,7 маротиба ва аз рӯи вазн 2,1 маротиба камтар аст. Инчунин шумораи кишварҳои кумакрасон низ дар ин давра аз 44 ба 35 кишвар коҳиш ёфтааст.
Дар семоҳаи аввали соли ҷорӣ ба Тоҷикистон аз ҳама бештар Чин (26,2%), Белгия (17,8%), ИМА (15,8%), Қазоқистон (8,6%), Русия (7,9%), Туркия (5,6%), Ҳиндустон (2,9%), Узбекистон (2,6%), Дания (2,3%) ва Олмон (2%) кумак равон кардаанд.
Гуфта мешавад, Тоҷикистон аз ҳама бештар дар соли 2022 бо маблағи умумии 141 миллион доллар ва аз ҳама камтар дар соли 2015 бо арзиши 44,8 миллион доллар кумаки башардӯстона дарёфт кардааст.
Мақомоти Тоҷикистон дар бораи тақсими кумакҳои башардӯстона дар миёни ниёзмандон ба расонаҳо маълумот намедиҳад. Ба гуфтаи огоҳони умур, кумакҳои башардӯстона аз ҷониби мақомдорон дар аксар ҳолат дуздида ва дар бозорҳо фурӯхта мешаванд ё қисме аз он аз номи Президент ба ниёзмандон тақсим карда мешавад.
Ҳатто, ахиран мушоҳида шуда, ки Арабистони Саудӣ ба хотири пешгирӣ кардан аз ин дуздиҳо рӯи тамоми маҳсулоте, ки дар доираи лоиҳаи “Сабади озӯқаворӣ дар Ҷумҳурии Тоҷикистон” барои тақсим кардан омода шуда буд, навишта буданд, ки “РОЙГОН ТАҚДИМ КАРДА ШУДА, ФУРӮХТА НАМЕШАВАД!”
