33.9 C
Dushanbe

Кушта шудани 4 корманди созмони байналмилалӣ дар Ғазза

Бино ба иттилои расонаҳо, шоми рӯзи душанбе дар пайи ҳамлаи нерӯҳои Исроил ба мошини гурӯҳи имдодрасони Бунёди хайрияи амрикоӣ дар Ғазза 4 хориҷӣ ва як фаластинӣ кушта шуд.

Гуфта мешавад, мошини кормандони бунёди хайрияи амрикоӣ ба номи “Ошпазхонаи марказии ҷаҳонӣ”, ки парчами байналмилалӣ дошт, ҳангоми иҷрои кор дар минтақаи Дайр-ул-Балаҳ, маркази Навори Ғазза аз ҷониби нерӯҳои Исроил мавриди ҳадаф қарор гирифт.

Вазорати беҳдошти Фаластин бо нашри изҳороте гуфт, ки ҷасади 4 хориҷӣ ва ронандаи онҳо, ки фаластинӣ буд, ба бемористони Шуҳадои Ақсо интиқол дода шуданд. Ин вазоратхона мегӯяд, дар ин ҳамла “чор хориҷӣ кушта шуданд, ки ҳувияти се нафари онҳо, бритониёӣ, устролиёӣ ва лаҳистонӣ мушаххас шудааст, аммо нафари чорум то ҳол мушаххас нест. Ва ронандаи онҳо, ки тарҷумони фаластинӣ ба номи Сайф Исом Абутоҳо буд, низ кушта шудааст.”

Дар ҳамин ҳол Вазорати корҳои хориҷии Британия бо нашри изҳороте гуфт, ки пас аз таҳқиқ мушаххас шуд, дар ин ҳамла ду шаҳрванди онҳо кушта шудааст. Девид Кэмерон, вазири хориҷаи Британия аз Исроил хоста, ки монеи кори кормандони соҳаи имдодрасонӣ ва башарӣ дар Ғазза нашавад ва бигузорад онҳо озодона ба корҳои худ расидагӣ кунанд.

Ҳамзамон Вазорати адлияи Лаҳистон низ гуфта, ки дар робита ба кушта шудани як шаҳрванди ин кишвар дар Ғазза, ки корманди ниҳоди байналмилалии кумакрасонӣ буд, парванда боз мекунад ва таҳқиқро шуруъ хоҳад кард.

Дар баробари ин сарвазири Испания низ гуфта, ки ҳукумати Исроилро зарур аст, ки ҳарчи зудтар қазияи ҳуҷум ба кормандони имдодрасонии байналмилалиро шарҳ диҳад.

Гуфта мешавад, Бунёди хайрияи “Ошпазхонаи марказии ҷаҳонӣ” барои таъмини маводи ғизоӣ ва кумакҳои башардӯстона барои аҳолии Ғазза фаъолият мекард. Дар пайи ин ҳуҷум Исроил бо нашри баёнияе гуфт, ки бо созмони мазкур барои таҳқиқи ҳодиса ҳамкорӣ дорад.

Бино ба иттилои Вазорати беҳдошти Ғазза, нерӯҳои Исроил давоми 24 соати гузашта 7 ҳамлаи хунини бесобиқа анҷом доданд, ки 71 нафар ҷон бохта, 102 нафари дигар ҷароҳат бардоштааст.

Ба иттилои ин ниҳод, аз оғози ҳамлаҳои Исроил ба Ғазза дар 7-уми октябри соли ҷорӣ то кунун 32 ҳазору 916 нафар кушта шудаанд, ки дар миёни онҳо танҳо 14 ҳазорашон кӯдакони ноболиғ ҳастанд. Ва ҳамчунин шумори захмиён ба 75 ҳазору 494 нафар расидааст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Гурӯҳе аз имомони мусалмони кишварҳои ғарбӣ ба Исроил сафар карданд

Субҳи 7-уми июл, Президенти Исроил Исаак Ҳерсог дар қароргоҳаш бо як гурӯҳ аз имомон ва намояндагони ҷомеаҳои мусалмонӣ аз Фаронса, Белгия, Нидерланд, Италия ва Британияи Кабир дидору гуфтугӯ намудааст.

Амрико гурӯҳи “Ҳайат Таҳрир аш-Шом”-ро аз листи террористон хориҷ кард

Иёлоти Муттаҳидаи Амрико гурӯҳи “Ҳайат Таҳрир аш-Шом”-ро, расман аз феҳристи созмонҳои террористӣ хориҷ кард.

Содир Ҷабборов ба Тоҷикистон омад

8-уми июли соли 2025 Президенти Қирғизистон Содир Ҷабборов бо даъвати раисҷумҳури худкомаи Тоҷикистон Эмомалӣ Раҳмон ба Душанбе омад.

Дар Маскав беш аз 500 муҳоҷирро ба шуъбаҳои пулис бурдаанд

Мақомоти Русия дар шаҳри Маскав барои ошкор кардани роҳҳои муҳоҷирати ғайриқонунӣ "рейд" гузарондааст.