Афғонистон барои афзоиши ҳаҷми воридоти нерӯи барқи Тоҷикистон бо мақомоти ин кишвар дар ҳоли гуфтушунид аст.
Ширкати таъминкунандаи барқи Афғонистон “Breshno” гуфта, ки сухан дар бораи зиёд кардани ҳаҷми воридоти нерӯи барқи Тоҷокистон ба Афғонистон меравад, ки онҳо мехоҳанд он аз 80 МВт соат ба 120 МВт соат расонида шавад.
Хабаргузории “Авесто” зимни нашри ин хабар навишта, ки ҳоло назари масъулони ширкати “Барқи тоҷик” дар ин бора дастрас нашуда аст.
Сухнагӯи ширкати “Брешна”, пештар хабар дода буд, ки интиқоли нерӯи барқи Узбекистон дар 13 вилояти Афғонистон ва ҳамзамон дар пойтахти кишвар Кобул қатъ шудааст.
Воҳидуллоҳ Тавҳидӣ, сухангӯи ин ширкат далелеи норасоии барқ дар Афғонистонро мушкилоти техникӣ дар нерӯгоҳи барқии Узбекистон гуфтааст.
Расонаҳо афғонӣ навиштанд, ки дар ҳоли ҳозир Афғонистон тақрибан ба 1600 мегаватт нерӯи барқ ниёз дорад, ки 70 дарсади онро аз Узбекистону Туркманистон ва Тоҷикистону Эрон ворид мекунад.
Хабари бештар кардани содироти нерӯи барқ аз Тоҷикситон ба Афғонистон дар ҳоле садо медиҳад, ки Тоҷикистон дар тамоми минтақаҳои кишвар, ки биноҳои баландошёна надоранд, лимити барқро ҷорӣ карда аст.
Пештар масъулони ширкати “Барқи тоҷик” чанд дафъа содироти барқи кишварро ба давлатҳои хориҷ рад карданд. Масъулон иддао карданд, ки “Айни замон вазъ душвор аст ва эҳтимол дорад, ки захираҳои об то баҳор нокифоя бошанд. Аз ин рӯ, чанд муддат зарур аст, ки интиқоли нерӯи барқ дар он минтақаҳое, ки биноҳои баландошёна надоранд, маҳдуд карда шавад”, – омадааст дар муроҷиати “Барқи тоҷик”.
Ҷорӣ шудани лимити барқро ширкати “Барқи тоҷик” ба кам шудани сатҳи об дар обанбори “Норак” рабт медиҳад. Тибқи маълумоти ин ширкат сатҳи оби обанбори “Норак” нисбат ба ҳамин давраи соли гузашта 4 метр камтар аст. Аммо дархости ширкати афғонистонии “Брешно”, ки мехоҳад Тоҷикистон ба онҳо барқро аз ҳаҷми муқарраршуда бештар содир кунад, яъне аз 80 МВт ба 120 МВт расонад, ҳама гуфтаҳои мақомоти тоҷикро зери суол мебарад.
Ҳамзамон дар баёнияи расмии ширкати барқрасони Афғонистон Брешна омада, ки “Ҳайати Афғонистон бо Тоҷикистон гуфтугӯ кард ва то ҳалли мушкили барқи Узбекистон Тоҷикистон дар ҳаҷми 100 мегаватт соат содироти барқашро ба ин кишвар меафзояд.
Чизе, ки коршиносон ва мунтақидон пайваста бар он таъкид мекунанд, ин аст, ки барқ дар кишвар аз ончи барои дохил лозим аст бештар тавлид мешавад. Ва “сабаби аслии ҷорӣ шудани лимит он аст, ки ҳукумат тарҷеҳ медиҳад онро ба хориҷ бифурӯшад”. Чун пулҳои барқи ба хориҷ фурӯхташуда на ба Тоҷикистон, балки ба хориҷа, ба ҳисоби офшории нафарони маълум интиқол дода мешаванд”.
Ин суханҳоро Мухиддин Кабриӣ раҳбари ПМТ чанде пеш дар паёме тариқи шабакаҳои иҷтимоӣ арз карда буд.
