Мақомоти Тоҷикистон ба расонаҳои мустақили дохилӣ фишор оварда, амр кардаанд, ки аз пӯшиши ҳаводисе, ки дар Вилояти Мухтори Кӯҳистони Бадахшон мегузарад, худдорӣ кунанд.
Хабаргузории “Азия-Плюс” имрӯз, 17-уми майи эълон кард, ки таҳти фишори мақомот қарор гирифта, дигар наметавонад ҳаводиси ВМКД-ро пӯшиш бидиҳад.
“Қабл аз ин, “Азия-Плюс” огоҳиномаи расмии Прокуратураи генералӣ ва огоҳиҳои ғайрирасмӣ аз ниҳодҳои дигарро дар мавриди он дарёфт карда буд, ки идораи мо ҳаводиси ВМКБ-ро “якҷониба” инъикос мекунад ва “вазъи кишварро ноором месозад”, омадааст дар хабар.
Ин хабаргузорӣ аз хонандагони худ узрхоҳӣ намуда, гуфтааст, дар сурати идомаи нашри ахбори ВМКБ расонаро хатари баста шудан таҳдид мекунад.
Шуруъ аз дирӯз, 16-уми май вазъ дар маркази маъмурии Вилояти Мухтори Бадахшон шаҳри Хоруғ дигарбора ноором шуд. Мардум бо талаби додхоҳӣ дар маркази шаҳр ҷамъ омадан мехостанд, аммо мақомот бо сокинони ҷамъомада бархурди сахт нишон дод, ки дар натиҷа як сокини осоишта ба ҳалокат расида шаш нафари дигар захмӣ шуд.
Вазорати корҳои дохилаи Тоҷикистон субҳи имрӯз 17-уми май расман эълон кард, ки 3 нафар аз асфарони интизомӣ захмӣ шудааст.
