Як марди 66-солаи сокини ноҳияи Рӯдакӣ ду пирамарди сокинони ҳамин ноҳия ва як пирамарди сокини пойтахтро фиреб дода, маблағҳои зиёди онҳоро гирифта, дигар барнагрдонидааст.
Тавре Вазорати корҳои дохилаи Тоҷикистон рӯзи 29-уми марти соли ҷорӣ хабар дод, ин марди 66-солаи сокини ноҳияи Рӯдакӣ, ки аз ӯ ном бурда намешавад, бо иттиҳоми қаллобӣ дар ҳаҷми зиёд гумонбар дониста мешавад.
Дар иттилоияи ВКД омада, ки “Ба ШВКД дар ноҳияи И.Сомонӣ аризаи марди 71-солаи сокини ноҳияи мазкур ворид гардидааст, ки соли 2011, марди 66-солаи сокини ноҳияи Рӯдакӣ бо роҳи фиреб ба бовариаш даромада, аз ӯ 31 ҳазору 500 доллари амрикоӣ гирифта, то ҳол маблағашро барнагардонидааст.”
Бино ба иттилои манбаъ, ин сокини ноҳияи Рӯдакӣ соли 2021 ҳамзамон аз сокини 68-солаи ҳамин ноҳия 70 ҳазор доллари амрикоӣ ва аз як марди 69-солаи сокини пойтахт 41 ҳазору 500 доллари амрикоӣ гирифта, аз онҳоро низ барнагардонидааст.
Дар маҷмӯъ марди 66-солаи сокини ноҳияи Рӯдакӣ ба ҷинояти қаллобӣ ба миқдори 143 ҳазор доллари амрикоӣ муттаҳам мешавад.
ВКД мегӯяд, вобаста ба ин қазия тафтишот идома дорад. Вале гуфта нашудааст, ки ҳоло гумонбар дар боздошт аст ё на. Ҳамчунин назари худи муттаҳам низ дастрас нест.
