Президенти Тоҷикистон Эмомалӣ Раҳмон дар суҳбат бо Шарл Мишел, Президенти Шӯрои Аврупо мувофиқа кардааст, ки муборизаи худро алайҳи гурӯҳҳои террористӣ ва экстримистӣ тақвият диҳанд.
Хадамоти матбуоти президенти Тоҷикистон бо нашри тафсилоти суҳбати Эмомалӣ Раҳмон бо Шарл Мишел гуфтааст: Тоҷикистон ҳеҷ гуна ҳукумати дигарро, ки бе дарназардошти мавқеъи кулли мардуми Афғонистон ва доираи васеи намояндагии ҳамаи миллатҳо, аз ҷумла тоҷикони этникӣ, инчунин узбекҳо, ҳазораҳо, туркманҳо ва дигар ақаллиятҳои миллӣ, ки дар он зиндагӣ мекунанд, таъсис дода мешавад, эътироф нахоҳад кард.”
Ба иттилои манбаъ: “Ҷонибҳо мавқеъи якдигарро оид ба мубориза бо терроризм, экстремизм, қочоқи маводи мухаддир, ҷиноятҳои фаромиллӣ ва дигар хатару таҳдидҳо ҷонибдорӣ намуданд.”
Аммо аз ҷониби дигар Ҳукумати Эмомалӣ Раҳмон, ки амалан ба як низоми ҳукумати хонаводагӣ ва гурӯҳӣ табдил шудааст, дар умри 30-солааш ягон маротиба интихоботи озод ва ҳукумати ҳамашумул, ки дар он тамоми нерӯҳои сиёсии Тоҷикистон мақоми шоистаи худро дошта бошанд, ташкил накардааст.
Ҳамзамон Тоҷикистон дар баробари гурӯҳҳои Толибону Алқоида Ҳизби наҳзати исломии Тоҷикистон (ҲНИТ), Паймони Милли Тоҷикистон (ПМТ) ва ҳаракати сиёсии “Гурӯҳи-24”-ро, ки ҳастаи мухолифини ҳукумати Эмомалӣ Раҳмонро дар хориҷ аз кишвар ташкил медиҳанд, низ гурӯҳҳои террористӣ ва экстримистӣ мешиносад.
Пеш аз ин, Юсуф Раҳмон, прокурори генералии Тоҷикистон зимни як сафари корӣ ба Аврупо бо ҳамотоёнаш аз Олмону Лаҳистон, Чеху Утриш ва Белгия, ки аксари мухолифини ҳукумат дар ин кишварҳои аврупоӣ мақоми паноҳандагӣ дарёфт кардаанд, мулоқот карда, барои тақвияти ҳамкориҳои дуҷониба ва бисёрҷониба бо онҳо машварат карда буд.
Инчунин мақомоти Тоҷикистон тайи 7 соли ахир борҳо кишварҳои узви Иттиҳодияи Аврупоро (ИА) ба пуштибонӣ ва ҳимоят аз нерӯҳои мухолифин муттаҳам карда, ғайри мустақим таҳдид карда буданд, ки дафтари ин иттиҳодия дар Душанберо мебанданд.
Аммо ҳодисаҳои ахири Афғонистон ва сари қудрат омадани ҳаракати Толибон дар ин кишвар ва мавқеъгириҳои Эмомалӣ Раҳмон дар ҳимоят аз тоҷикон ва дигар ақаллиятҳои қавмӣ дар Афғонистон бори дигар таваҷҷӯҳи сарони кишварҳои узви Иттиҳодияи Аврупо ва ғайраро ба Тоҷикистон ҷалб кардааст.
