Хона блог саҳифа 2

Раиси як хоҷагии деҳқонӣ барои куштори ду нафар ба ҳабси абад маҳкум шуд

Аз ҷониби
Azda TV 3
-
0

Додгоҳи вилояти Суғд раиси як хоҷагии деҳқониро барои куштори ду ҳамдеҳааш гунаҳкор дониста, ба ҳабси абад маҳкум кардааст. Дар ин бора Раёсати Вазорати корҳои дохилии вилояти Суғд хабар дод.

Тибқи иттилои мақомот, Хуршед Мавлонов, раиси як хоҷагии деҳқонӣ дар деҳаи Хистеварзи ноҳияи Бобоҷон Ғафуров, бо ҳукми додгоҳ ба адои ҷазо дар зиндони низомаш махсус маҳкум шудааст. Ҳукм аввали моҳи июли соли ҷорӣ содир гардидааст.

Ба иттилои мақомоти ҳифзи ҳуқуқ, ҳодиса рӯзи 27 апрели соли 2026 рух додааст. Гуфта мешавад, Хуршед Мавлонов дар пайи баҳси молу мулк бар сари бошишгоҳи саҳроӣ ду ҳамдеҳаи худро бо истифода аз силоҳи оташфишон парронда, ба ҳалокат расондааст.

Мавлонов пас аз ҳодиса боздошт шуда, нисбат ба ӯ парвандаи ҷиноятӣ боз гардид. То ҳол маълум нест, ки худи ӯ ё вакилони дифоъ аз болои ҳукми додгоҳ шикоят хоҳанд бурд ё не.

Таъйини ҷазои ҳабси абад барои ҷинояти куштор дар Тоҷикистон нисбатан кам рух медиҳад ва чунин ҳукмҳо маъмулан дар парвандаҳои вазнин содир мешаванд.

То 46 дараҷа гармӣ ва хатари сел: Тоҷикистон аз мавҷи гармо ҳушдор дод

Аз ҷониби
Azda TV 3
-
0

Агентии обуҳавошиносии назди Кумитаи ҳифзи муҳити зисти Тоҷикистон аз сокинон ҳушдор додааст, ки аз 15 то 18 июл дар аксари минтақаҳои кишвар ҳарорати ҳаво ба таври назаррас боло меравад ва дар баъзе ноҳияҳо то 46 дараҷа хоҳад расид.

Тибқи пешгӯии синоптикҳо, дар ноҳияҳои водии ҷумҳурӣ ҳарорати рӯзона аз +41 то +46 дараҷа пешбинӣ мешавад. Дар ноҳияҳои доманакӯҳ ва кӯҳӣ ҳарорат ба +33 то +38 дараҷа мерасад. Дар ноҳияи Дарвози Вилояти Мухтори Кӯҳистони Бадахшон низ ҳаво то +39–41 дараҷа гарм хоҳад шуд.

Мутахассисон мегӯянд, ки дар баробари гармии шадид, хатари рух додани падидаҳои табиӣ низ зиёд мешавад. Аз ҷумла, дар ноҳияҳои доманакӯҳ ва кӯҳии тобеи ҷумҳурӣ, вилояти Суғд ва ғарби ВМКБ эҳтимоли фаромадани селҳои вобаста ба обшавии пиряхҳо вуҷуд дорад. Ҳамзамон, боло рафтани сатҳи об дар ҳавзаҳои дарёҳои Панҷ, Зарафшон ва Вахш низ пешбинӣ мешавад.

Пизишкон ва мутахассисони соҳаи тандурустӣ тавсия медиҳанд, ки шаҳрвандон дар соатҳои аз ҳама гарм аз будубоши тӯлонӣ дар зери офтоб худдорӣ кунанд, бештар об нӯшанд ва ба саломатии кӯдакон, пиронсолон ва шахсони гирифтори бемориҳои музмин диққати махсус диҳанд. Ҳарорати баланд метавонад хатари гармозадагӣ, камобшавии организм ва авҷ гирифтани баъзе бемориҳоро зиёд кунад.

Мавҷи гармо танҳо ба Тоҷикистон маҳдуд нест. Дар ҳафтаҳои охир чанд кишвари Аврупо низ бо ҳарорати ғайримуқаррарӣ рӯбарӯ шудаанд. Дар баъзе минтақаҳои Испания, Италия, Юнон ва Фаронса гармии шадид боиси сар задани сӯхторҳои ҷангал, хушксолӣ ва таҳдид ба саломатии аҳолӣ гардидааст. Коршиносон афзоиши чунин мавҷҳои гармо дар солҳои охирро яке аз паёмадҳои тағйирёбии иқлим арзёбӣ мекунанд.

Эмомалӣ Раҳмон аз қонуншиканиҳо дар зиндонҳо изҳори нигаронӣ кард

Аз ҷониби
Azda TV 3
-
0

Президенти Тоҷикистон Эмомалӣ Раҳмон аз қонуншикании баъзе кормандони Сарраёсати иҷрои ҷазо изҳори нигаронӣ карда, гуфт, ки чунин ҳолатҳо боиси поймол шудани ҳуқуқи маҳбусон мегарданд. Ӯ рӯзи 14-уми июл зимни ифтитоҳи бинои нави Вазорати адлия аз мақомоти масъул хост, ки низоми назорати дохилии муассисаҳои ислоҳиро бозбинӣ ва назоратро тақвият диҳанд.

Ин дар ҳолест, ки солҳои охир худи маҳбусон, наздикони онҳо ва созмонҳои ҳомии ҳуқуқи инсон борҳо аз шиканҷа, бадрафторӣ, фишори равонӣ, шароити номусоиди нигоҳдорӣ, сифати пасти ғизо ва норасоии хизматрасонии тиббӣ дар муассисаҳои ислоҳии Тоҷикистон изҳори нигаронӣ кардаанд.

Чанде пеш низ наздикони Маҳмадалӣ Ҳайит ва Саидумар Ҳусайнӣ, ду маҳбуси сиёсӣ, дар суҳбат бо расонаҳо аз шиканҷа, бадрафторӣ ва шароити бади нигоҳдории боздоштшудагон хабар доданд. То кунун мақомоти Тоҷикистон ба ин иддаоҳо вокуниши расмӣ ироа накардаанд.

Дар ҳамин ҳол, мунтақидони Эмомалӣ Раҳмон бар ин назаранд, ки чунин изҳорот бештар хусусияти намоишӣ дорад. Ба гуфтаи онҳо, бо вуҷуди чунин дастурҳо, дар бораи нақзи ҳуқуқи маҳбусон ва шароити нигоҳдории онҳо тайи солҳои охир ҳамоно гузоришҳо нашр мешаванд ва ба гуфтаи мунтақидон, барои ҳалли ин мушкилот тағйироти ҷиддӣ ба назар намерасад.

Дар Русия 160 ҳазор шаҳрванди Тоҷикистон таҳти назорат қарор доранд

Аз ҷониби
Azda TV 3
-
0

Ҳудуди 160 ҳазор шаҳрванди Тоҷикистон дар рӯйхати шахсони таҳти назорати мақомоти Русия қарор доранд. Дар ин бора муовини вазири меҳнат, муҳоҷират ва шуғли аҳолии Тоҷикистон Шариф Норзода зимни нишасти матбуотӣ оид ба натиҷаҳои фаъолияти нимсолаи аввали соли 2026 хабар дод.

Ба гуфтаи ӯ, аз шумораи умумии шаҳрвандони шомили ин рӯйхат тақрибан 25 ҳазор нафарро ноболиғон ташкил медиҳанд. Ӯ тавзеҳ дод, ки аксари ноболиғон ҳамчун аъзои оилаи муҳоҷирони меҳнатӣ ба Русия рафта, ба ин рӯйхат ворид шудаанд.

Мақомоти Вазорати меҳнат инчунин иттилоъ доданд, ки маълумоти пойгоҳи шахсони таҳти назорат мунтазам нав карда шуда, ҳар чор соат тағйир меёбад. Аз ин рӯ, шаҳрвандон метавонанд пеш аз сафар вазъи ҳуқуқии худро санҷанд.

Ёдовар мешавем, ки рӯйхати шахсони таҳти назорат дар Федератсияи Русия аз 5 феврали соли 2025 мавриди амал қарор гирифтааст. Ба он шаҳрвандони хориҷие шомил карда мешаванд, ки ҳуқуқи қонунии будубоши худро дар қаламрави Русия аз даст додаанд. Нисбати чунин афрод реҷаи махсуси ихроҷ татбиқ шуда, як қатор маҳдудиятҳо, аз ҷумла манъи иваз кардани ҷойи зист, идора кардани воситаи нақлиёт, харидани амвол ва анҷом додани баъзе амалиёти бонкӣ ҷорӣ мегардад.

Ба иттилои Вазорати меҳнат, дар шаш моҳи аввали соли ҷорӣ зиёда аз 15 ҳазор шаҳрванд барои гирифтани машварат ва санҷиши вазъи худ ба Хадамоти муҳоҷират муроҷиат кардаанд. Дар натиҷаи санҷиш маълум шудааст, ки 3 ҳазору 953 нафар бо сабаби муваққатан манъ будани вуруд ба Русия аз сафар худдорӣ кардаанд.

Ҳамзамон, вазорат хабар медиҳад, ки дар ҳамин давра зиёда аз 10 ҳазору 700 шаҳрванде, ки аз муҳоҷирати меҳнатӣ ба Ватан баргаштаанд, бо ҷойи кор таъмин шудаанд.

Омор нишон медиҳад, ки шумораи шаҳрвандони Тоҷикистон дар рӯйхати шахсони таҳти назорати мақомоти Русия дар ҳоли афзоиш аст. Агар моҳи октябри соли 2024 дар ин рӯйхат зиёда аз 120 ҳазор нафар қарор дошта бошанд, моҳи ноябри соли 2025 ин нишондод аз 150 ҳазор нафар гузашта буд. Ҳоло бошад, тибқи маълумоти расмӣ, теъдоди онҳо ба 160 ҳазор нафар расидааст.

Афзоиши истеҳсоли маҳсулоти саноатӣ ва музди миёна дар Тоҷикистон

Аз ҷониби
Azda TV 3
-
0

Афзоиши истеҳсоли маҳсулоти саноатӣ ва музди миёна дар Тоҷикистон
Иқтисоди Тоҷикистон дар соли 2026 рушди чашмрасе нишон медиҳад. Натиҷаҳои расмии нимсолаи аввал нишом медиҳанд, ҳаҷми истеҳсоли маҳсулоти саноатӣ дар кишвар нисбат ба ҳамин давраи соли гузашта 14,1% афзоиш ёфтааст. Мақомот мегӯянд ин бахш ба локомотиви асосии рушди умумии иқтисодӣ табдил ёфтааст. Дар ҳамин ҳол, коршиносон ба ин иддаъо бо шубҳа менигаранд ва мегӯянд дар Тоҷикистон изофанависӣ дар омор, бахусус оморҳои моҳонаву семоҳа зиёд мушоҳида шудааст.
Дар ҳамин ҳол, Бонки Осиёии Рушд пешбинӣ мекунад, ки рушди ниҳоии ММД-и Тоҷикистон дар соли 2026 дар сатҳи 7,3% хоҳад буд. Тибқи омор, дар семоҳаи аввал иқтисод рушди 8-дарсадӣ нишон медод.
Ҳамзамон, омор аз афзоиши тақрибан 20%-ии музди миёнаи меҳнат гузориш медиҳанд. Мувофиқи маълумоти охирини оморӣ, то тобистони соли 2026 музди миёнаи номиналии меҳнат дар Тоҷикистон нисбат ба соли гузашта тақрибан 20% (19,8%) афзоиш ёфта, ба 3194,45 сомонӣ (ҳудуди 345 доллари ИМА) расид. Дар ин миён, вилояти Суғд ҳамчун минтақаи дорои баландтарин музди меҳнат дар кишвар сабт шудааст.
Тоҷикистон аз ҳамони истиқлол то имрӯз дар омори иқтисодӣ ҳамеша дар поёнтарин зина байни кишварҳои собиқи Шӯравӣ қарор дорад ва ҳаргиз он зинаро ба касе вонагузоштааст.

Қимори Тоҷикистон рӯи истихроҷи литий бар пайи уфти қимати он

Аз ҷониби
Azda TV 3
-
0

Мақомоти Тоҷикистон нақша доранд лоиҳаи истихроҷи литийро дар кони Намадгути ноҳияи Ишкошими ВМКБ дар давоми соли оянда роҳандозӣ кунанд.

Вазири саноат Шералӣ Кабир иддао кард 80%-и таҷҳизоти зарурӣ аллакай ба кишвар ворид карда шудааст. Лоиҳа гоме барои ҷалби истеҳсолкунандагони электромобилҳо ва аккумуляторҳо муаррифӣ мешавад. Аммо коршиносон ва таҳлилгарони иқтисодӣ аз ҳукумат бинобар махфияти комили лоиҳа интиқод мекунанд.

Гуфта мешавад мақомот ҳаҷми захираҳои литий, миқдори металл дар таркиби маъдан, инчунин арзиши умумӣ ва худкафоии лоиҳаро пинҳон медоранд.

Гузашта аз ин, оғози ин лоиҳа дар пасманзари коҳиши нархи ҷаҳонии литий (ки нисбат ба авҷи соли 2022 70% арзонтар аст) сурат мегирад ва фоидаовар шудани он дар дурнамои кӯтоҳмуддатро зери суол мебарад.

Қимати литий бинобар камбуди истихроҷи он дар чаҳор соли қабл ба авҷи худ расид, аммо бо чанд сабаб бо суръат қиматашро аз даст медиҳад, аз ҷумла: афзоиши бесобиқаи истихроҷи он дар ҷаҳон – аз ҷумла Чин ва Амрикои Лотинӣ, суръати бисёр ками афзоиши фурӯши мошинҳои барқӣ бо фарқ аз пешбинии коршиносон, хавфи бозор аз бештар шудани пешниҳод нисбати талабот ва ғайра.

Мушкили коркарди нафт дар Русия ва таъсири он ба Тоҷикистон

Аз ҷониби
Azda TV 3
-
0


Ҳаҷми коркарди нафт дар Русия то поёнтарин сатҳ дар тӯли беш аз 20 сол коҳиш ёфтааст.

Бино ба гузориши «EA Analytics», дар моҳи июли соли 2026 ҳаҷми миёнаи коркарди нафт дар Федератсияи Русия 3,91 миллион баррел дар як шабонарӯзро ташкил медиҳад, ки ин поёнтарин нишондиҳанда аз моҳи марти соли 2005 ба ин сӯ гуфта мешавад.

Омор нишон медиҳад, ин ҳафм нисбат ба нишондиҳандаи миёнаи ҳамин давраи соли 2025 беш аз 1,4 миллион баррел дар як шабонарӯз камтар аст.

Бино ба ҳисобҳои «Bloomberg», дар 100 рӯзи ахир нерӯҳои Украина ба корхонаҳои тавлиди сӯзишвории Русия тақрибан 50 ҳамла анҷом додаанд. Ва тибқи иттилои Ожонси байналмилалии энержӣ, мавҷи ҳамлаҳои Украина аз аввали моҳи май ба беш аз нисфи тавоноиҳои коркарди нафти Федератсияи Русия таъсир расондааст.

Ҳадди ақал 24 адад аз 34 корхонаи бузурги коркарди нафт (ККН), ки аксари онҳо бо бузургтарин ширкатҳои нафтии Русия алоқаманданд, мавриди ҳамла қарор гирифтаанд.

Дар моҳи июн корхонаҳои коркарди нафти Русия дар як шабонарӯз ҳудуди 3,8 миллион баррел нафтро коркард кардаанд, ки ин нисбат ба ҳамин давраи соли гузашта 1,6 миллион баррел камтар аст.

Зарбаи Укроин ба корхонаҳои тавлиди сӯзишвории Русия дар Тоҷикистон ҳам бӯҳрони камбуди сӯзишворӣ эҷод кардааст. Дар кишвар қимати сӯзишворӣ вобаста аз намуд аз 10 то 20 дарсад афзоиш ёфта, харидани онҳо низ мушкил шудааст. Барои мисол уимати сӯзишвории дизелӣ 18 дарсад боло рафта ба 16,5 сомонӣ расидааст. Дар ҳамин ҳол, ронандагон барои харидани дизел соатҳо навбат мепоянд.

Гуфта мешавад мусофирбарҳои дохилишаҳрӣ дар Хуҷанд ҳам ба мушкили дарёфт ва заоиди сӯзишворӣ мувоҷеҳ шудаанд, ки боиси камтар шуани нақлиёти мусофирбар дар дувумин шаҳри Тоҷикистон гаштааст.

Наздики 50 парванда барои “монеъ шудан” аз таҳсили фарзанд

Аз ҷониби
Azda TV 3
-
0

Раёсати ВКД дар шаҳри Душанбе омори такондиҳандаеро нашр кард, ки дар он гуфта мешавад дар нимсолаи аввал дар пойтахт нисбати волидон барои монеъ шудан ба таҳсили ҳатмии кӯдакон 47 парвандаи ҷиноятӣ боз шудааст.

Парвандаҳо бар асоси моддаи 164-и Кодекси ҷиноятии Ҷумҳурии Тоҷикистон боз мешаванд. Шаҳрвандон дар шабакаҳои иҷтимоӣ ва нозирони мустақил ин гуна бархӯрди сахтгиронаи мақомотро зери интиқод қарор медиҳанд.

Онҳо таъкид мекунанд, ки ба ҷои кумаки воқеӣ ба оилаҳои камбизоат, ки имкони барои мактаб омода кардани фарзандонашонро надоранд ва ё барои зинда мондан маҷбуранд онҳоро ба кор ҷалб кунанд, давлат онҳоро бо ҷаримаҳои ҳангуфт (то 1200 нишондиҳанда барои ҳисобҳо) ва ё ҳатто ҳукми зиндон то 2 сол ҷазо медиҳад.

Мунаққидон изҳор медоранд, ки чораҳои ҷазодиҳӣ решаи мушкилот — яъне камбизоатии аҳолиро ҳал намекунанд.

Мақомоти Тоҷикистон дигар омори интиқоли тобутҳоро аз хориҷ нашр намекунанд

Аз ҷониби
Azda TV 3
-
0

Мақомоти Тоҷикистон аз эълони омори интиқоли ҷасади шаҳрвандони кишвар аз хориҷ худдорӣ мекунанд. Ин масъала дар нишастҳои матбуотии чанд ниҳоди давлатӣ матраҳ шуд, аммо масъулон аз пешниҳоди рақамҳои расмӣ худдорӣ карданд.

Рӯзи 13-уми июл хабарнигорон аз роҳбарияти Вазорати меҳнат, муҳоҷират ва шуғли аҳолӣ пурсиданд, ки дар нимаи аввали соли ҷорӣ чанд ҷасади шаҳрвандони Тоҷикистон аз кишварҳои хориҷӣ, бахусус Русия, ба ватан интиқол дода шудааст. Намояндагони вазорат аз посухи мустақим худдорӣ карда, танҳо гуфтанд, ки ин масъала ба салоҳияти мақомоти ҳифзи ҳуқуқ вобаста аст.

Чанд рӯз пеш аз ин низ раиси Оҷонси ҳавонавардии Тоҷикистон Ҳабибулло Назарзода зимни нишасти матбуотӣ аз эълони омори интиқоли тобутҳо тавассути фурудгоҳҳои кишвар худдорӣ карда буд.

Ин дар ҳолест, ки солҳои қабл чунин маълумот мунтазам дастраси ҷомеа қарор мегирифт. Барои мисол, соли 2025 танҳо тавассути фурудгоҳҳои Душанбе ва Кӯлоб 1623 тобути шаҳрвандони Тоҷикистон аз Русия ба ватан интиқол дода шуда буд. Дар солҳои пеш аз оғози ҷанги Русия ва Украина низ Хадамоти муҳоҷират мунтазам омори интиқоли ҷасадҳои муҳоҷиронро нашр мекард.

Бо вуҷуди ин, пас аз оғози ҷанги Русия алайҳи Украина нашри чунин омор амалан қатъ гардид. Дар ин муддат расонаҳо борҳо аз reinf шудани шаҳрвандони Тоҷикистон дар ҷанг ва интиқоли ҷасади онҳо ба ватан хабар додаанд, аммо мақомоти расмӣ дар бораи шумораи умумии чунин ҳолатҳо маълумоти муфассал пешниҳод намекунанд.

Худдории мақомоти Тоҷикистон аз нашри омори интиқоли тобутҳо дар ҳолест, ки ҳазорон шаҳрванди кишвар барои кор дар хориҷ, бахусус Русия, қарор доранд ва масъалаи амнияти муҳоҷирони меҳнатӣ ҳамеша аз мавзӯъҳои муҳим барои ҷомеа ба ҳисоб меравад.

Боздошт барои изофанависии 384 ҳазор сомонӣ

Аз ҷониби
Azda TV 3
-
0

Вазорати корҳои дохилии Тоҷикистон аз боздошти муҳосиби шуъбаи фурӯши шабакаҳои барқи ноҳияи Абдураҳмони Ҷомии вилояти Хатлон хабар дод. Ба иттилои мақомот, ӯ ба ворид кардани маълумоти бардурӯғ ба барномаи биллинг ва изофанависии маблағҳо дар суратҳисобҳои як қатор муассисаҳои давлатӣ гумонбар мешавад.

Тибқи иттилои ВКД, гумонбар дар давраи фаъолияташ бо истифода аз барномаи биллинг ба суратҳисобҳои мактабҳои таҳсилоти миёна, беморхонаи марказии ноҳия ва мақомоти иҷроияи ҳокимияти давлатӣ маълумоти бардурӯғ ворид карда, беш аз 384 ҳазор сомонӣ маблағро ғайриқонунӣ ба қайд гирифтааст.

Назари худи боздоштшуда ё вакили дифои ӯ то ҳол дастрас нест.

Ин қазия дар ҳоле расонаӣ мешавад, ки Вазорати энергетика ва захираҳои об чанде пеш эълон кард, қарзи аҳолӣ аз истифодаи нерӯи барқ ба 1,1 миллиард сомонӣ расидааст. Ҳамчунин, аз ҷумлаи қарздорони бузург Ширкати алюминийи тоҷик (ТАЛКО), Оҷонсии беҳдошти замин ва обёрӣ, корхонаҳои обу корез ва як қатор муассисаҳои буҷетӣ низ номбар шудаанд.

Қазияи изофанависии маблағи барқ солҳои охир борҳо аз ҷониби сокинон дар шабакаҳои иҷтимоӣ матраҳ шудааст. Бархе шаҳрвандон мегӯянд, дар сурати сари вақт напардохтани ҳаққи истифодаи барқ, интиқоли нерӯи барқ ба хонаҳояшон фавран қатъ мешавад, аммо ҳамзамон намедонанд қарзҳои бузурге, ки ҳамасола дар омори расмӣ эълон мешаванд, аз куҷо пайдо мегарданд.

Бархе коршиносон низ мегӯянд, омори расмии қарздории соҳаи барқ ба шарҳи бештар ниёз дорад ва таъкид мекунанд, ки то замоне шаффофияти пурраи ҳисоббаробаркунӣ таъмин нашавад, чунин рақамҳо метавонанд боиси суолу шубҳаи ҷомеа гарданд.

123...930саҳифаи 2 аз 930