Вазорати корҳои дохилӣ дар барномаи “Ахбори ВКД” вуҷуди “ҷин” дар шаҳри Ваҳдатро рад карда, ҷузъиёти ҳодисаро шаҳр додааст.

21-уми августи соли 2024, Вазорати корҳои дохилӣ (ВКД)-и Тоҷикистон бо нашри гузорише хабар дод, ки се нафарро барои паҳнкардани хабари бардурӯғ дар бораи вуҷуди “ҷин” дар шаҳри Ваҳдат боздошт кардаст.

Дар ин гузориш омадааст, “нафарони ҳангомаҷӯ бо сабт ва паҳн кардани ҳар гуна наворҳои муқаррарӣ ва бо шарҳи нодуруст дар шабакаҳои иҷтимоӣ сокинони шаҳри Ваҳдатро ба ташвиш овардаанд”.

ВКД шаҳр додааст,ки навори чанд рӯз пеш дар шабакаҳои иҷтимоӣ паҳнгардида дар бораи он ки дар ҷамоати Раҷаб Исмоилови шаҳри Ваҳдат гӯё “ҷин” ба ҷавони 19-сола Ҷовидон Назруллоев таъсир расонида ва як сар гӯсфанди ӯро сар аз тан ҷудо кардааст, бардурӯғ паҳн шудааст.

Ҷовидон Назруллоев дар гузориш ҳодисаро чунин шарҳ додааст: “Ҳар бегоҳӣ гусфандҳоямро ба боғ бурда мечарондам. Рӯзи 17-уми август дар байни гӯсфандонам яктояш ғалтид ва дигар нахест. Ман хаёл кардам, ки ҳаром шуд, кордро гирифта хостам онро ҳалол кунам. Дар ҳаётам молро накушта будам ва ин аввалин бор буд. Вақти куштани гӯсфанд дар сару рӯям хун парид ва ман аз ҳуш рафтам. Дигар ягон чӣ дар хотирам нест. Байни мардум овозаҳое паҳн шуда, ки гунг шудааст, мурдааст, “ҷин” задааст, ин гапҳо ҳама дурӯғ аст”.

Вазорати корҳои дохилӣ боздашти як ҷавони африқоӣ, ки гуё мардумро дар шаҳри Ваҳдат метарсондааст, шаҳр дода гуфтааст ин ҷавони африқоӣ барои муаян кардани шахсияташ боздошт шуда буд, боздошти ӯ ҳеч рабте ба  ҳодисаҳои шаҳри Ваҳдат надорад. ВКД дар ин робита Шокиров Муҳаммадрофеъ, сокини шаҳри Ваҳдат ва Раҷабов Шаҳром, сокини шаҳри Душанберо  боздошт кардааст

Яке аз бозошт шудаҳо мегӯяд, “рӯзи 17-уми август дар шаҳри Ваҳдат деҳаи Хоҷабойқул вақте милитсия як нафари сиёҳпӯстро барои шахсияташро фаҳмидан ба мошин бор мекард, мо ин ҳолатро ба навор гирифта, дар интернет паҳн кардем, ки гӯё вай ҳамон “ҷин” мебошад”.

Гуфта мешавад, пас аз нашри чанд навор дар шабакаҳои иҷтимоӣ, ки дар онҳо гуфта мешуд, вуҷуди “ҷин”-е, ки болои бомҳои хонаҳои мардум дар шаҳри Ваҳдат медаваду озор медиҳад, бархе сокинонро дар ба таҳлука андохта, ҳангомае байни корбарон дар шабакаҳои иҷтимоӣ низ ба вуҷуд оварда буд.

Вазорати корҳои дохилии Тоҷикистон хабар додааст, ки бо вуҷуди сангинтар шудани ҷазо барои фолбинҳо ҳамоно теъдоди онҳо дар пойтахт кам нашудааст.

Имрӯз, 22-уми августи соли 2024, Раёсати Вазорати корҳои дохилии Тоҷикистон дар шаҳри Душанбе хабар дод, ки “давоми соли ҷорӣ 141-нафар фолбинону ҷодугарон муайян ва нисбаташон чораҳои таъсиррасони қонунӣ татбиқ карда шудаанд.”

Ба қавли манбаъ, бо вуҷуди пурзӯр кардани мубориза алайҳи фолбинҳо ва ҷодугарон дар шаҳри Душанбе, пойтахти Тоҷикистон “ҳанӯз ин тоифаи муфтхурон аз байн нарафтаанд.”

Бар асоси тағйироти нав аз 21-уми июни соли ҷорӣ ба моддаи 482 Кодекси ҳуқуқвайронкунии маъмурӣ (КҲМ)-и Ҷумҳурии Тоҷикистон “барои машғул шудан ба фолбинӣ ба шахсони воқеӣ ба андозаи аз ҳаштод то 100 нишондиҳанда барои ҳисобҳо ҷарима ё ҳабси маъмурӣ ба муҳлати аз 10 то 15 шабонарӯз таъин карда мешавад.”

Аммо онҳое, ки баъди татбиқи ҷазои маъмурӣ дар давоми сол ба фолбинӣ машғул мешаванд, “ҷарима ба андозаи аз як ҳазору панҷсад то ду ҳазор нишондиҳанда барои ҳисобҳо ё маҳрум сохтан аз озодӣ ба муҳлати аз як то ду сол ҷазо дода мешавад.”

Гуфта мешавад, як нишондиҳанда барои ҳисобҳо айни замон дар Тоҷикистон 72 сомонӣ мебошад, касоне, ки бори дувум бо ҷурми фолбинӣ дастгир мешаванд, онҳоро ҷарима ба андозаи 108 ҳазор сомонӣ то 144 ҳазор сомонӣ, ҳудуди 14 ҳазор доллари амрикоӣ ва ё то ду соли зиндон таҳдид мекунад.

Зиёда аз 96 дарсади аҳолии Тоҷикистон пайравони дини ислом мебошанд. Фолбинӣ ва ҷодугарӣ ҳар ду аз дидгоҳи шариати исломӣ амали нораво буда, дини ислом ҳар навъ машғул шудан ба ин корҳоро ва ё рафтан ба назди фолбину ҷодугарон ва тасдиқ кардани гуфтаҳои онҳоро маҳкум мекунад.

Тоҷикистону Қазоқистон байни худ 14 қарордоди тиҷоратӣ ва созишномаи ҳамкорӣ ба маблағи умумии 1,2 миллиард долларро дар шаҳри Душанбе имзо карданд.

Бино ба иттилои расмӣ, 22-уми августи соли 2024 Эмомалӣ Раҳмон, Президенти Тоҷикистон бо Қосим-Жомарт Тоқаев, Президенти Қазоқистон, ки бо сафари дурӯза вориди кишварамон шудааст, дар шаҳри Душанбе мулоқот кард.

Хадамоти матбуоти Президенти Тоҷикитсон бо нашри гузорише хабар дода, ки дар рафти ин мулоқот гуфта шуд, “ҳаҷми гардиши мол миёни ду кишвар дар нимсолаи соли равон дар муқоиса ба ҳамин давраи соли гузашта 20 фоиз афзудааст.” Инчунин “ҷонибҳо ба мувофиқа расиданд, ки ҳаҷми гардиши молро то ба 2 миллиард доллари амрикоӣ расонанд.”

Бар асоси ин гузориш, Тоҷикистон дар панҷ соли ахир ҳудуди 700 миллион доллари амрикоӣ сармоя аз Қазоқистон ворид кардааст. Инчунин дар ҳоли ҳозир дар Тоҷикистон 92 корхонаи муштарак бо ҷалби сармояи Қазоқистон амал мекунанд ва дар аз сӯи дигар дар Қазоқистон низ 89 корхона бо иштироки соҳибкорони тоҷик фаъолият доранд.

Гуфта мешавад, Тоҷикистон асосан ба Қазоқистон бархе маҳсулоти полезӣ ва ҳудуди 80 дарсади маҳсулоти меваи хушки худро содир мекунад. Қазоқистон ҳам ба Тоҷикистон орду гандум, бархе маҳсулоти ғалладонагӣ ва қисман ҳам маҳсулоти нафтӣ содир мекунад.

Президенти Қазоқистон Қосим-Жомарт Тоқаев, дирӯз, 21-уми августи соли ҷорӣ бо сафари давлатӣ вориди Тоҷикистон шуд, имрӯз, 22-уми моҳи ҷорӣ сафари ӯ ба поён расида, Душанберо ба мақсади Остона тарк мекунад.

Боғдорони ноҳияи Ашти вилояти Суғд дар вақти ҳосилғундорӣ дар боғҳои зардолӯ ба мушкили норасоии коргар рӯбарӯ шудаанд.

Хабаргузории Азия-Плюс, имрӯз, 22-уми августи соли 2024 бо нашри як гузорише гуфтааст, афзоиши муҳоҷират аз ин ноҳияи Ашт ба хориҷи кишвар боис шуда, ки дастмузди коргарони кироя ба таври қобили мулоҳиза боло биравад ва ба ин далел деҳқонони ноҳия маҷбур мешаванд, то ними ҳосили худро ба онҳо бидиҳад.

Ба қавли манбаъ, дар ҳоли ҳозир байни сокинони вилоят таҷрибаи “50/50” машҳур шуда аст, ки соҳиббоғ нисфи боғи худро барои ҷамъоварии ҳосил ройгон медиҳед.

Дар ин гузориш зирк шуда, ки «дар воқеъ, онҳое, ки замин надоранд, бурд мекунанд, онҳо харҷи андоз надоранд, ғами обу нурӣро ҳам намехуранд. Ба онҳо танҳо лозим аст хосилро ҷамъоварӣ кунанд. Дар ҳоле, ки деҳқон нисфи фоидаи худро аз даст медихад, ва барои нигаҳдории боғ боз маблағ сарф мекунад. Аммо танҳо барои он ки ҳосил пусида, талаф наёбад, маҷбуранд ба чунин иқдомҳои шадид даст бизанан”, -гуфтааст, яке аз боғбонони ин ноҳия.

Гуфта мешавад, тибқи оморҳои расмӣ аз оғози соли ҷорӣ то моҳи июл ҳудуди 24 ҳазор нафар сокинони ноҳияи Ашт ба муҳоҷирати меҳнатӣ сафар кардаанд, ки 7 ҳазори ононро занон ташкил медиҳанд. Ин дар ҳолест, ки дар ҳамин давари соли гузашта ин рақам 17 ҳазору 500 нафарро ташкил медод ва аз ин ҳисоб 5 ҳазор нафари онҳоро занон ташкил медоданд.

Ноҳияи Ашт яке аз ноҳияҳои калонтарини дорои боғу токзорҳои шимоли Тоҷикистон мебошад. Майдони умумии боғҳо наздик ба 20 ҳазор гектарро ташкил медиҳанд, ки 90 фоизи ин заминҳоро боғҳои зардолӯ ташкил медиҳад.

Русия алайҳи Шоҳзода Карим Оқохон, пешвои исмоилиёни ҷаҳон ва 4 нафари дигар аз раҳбарони Бунёди Оқохон ва созмонҳои марбут ба он таҳрим ҷорӣ кардааст.

Бино ба иттилои расмӣ, 19-уми августи соли 2024, Русия бар зидди 32 нафар аз намояндагони созмонҳо ва ниҳодҳои марбут ба Британияи Кабир таҳрим эълон кард.

Вазорати корҳои хориҷии Русия гуфтааст, ки дар байни онҳо, раҳбарони мазҳабӣ аз ҷумла Шоҳзода Карим Оқохони чаҳорум, пешвои исмоилиёни ҷаҳон ва 4 нафари дигар аз раҳбарони Бунёди Оқохон ва созмонҳои марбут ба он: Кристофер Эндрю, Мэтт Рид, Ализа Митҳа ва Николас Макграт – низ таҳрим ҷорӣ кардааст.

Гуфта мешвад, Бунёди Оқохон дар Русия асосан ба корҳои хайрия машғул буд ва чанд сол пеш президент Владимир Путин дар дидор бо Шоҳзода Карим Оқохони чаҳорум аз фаъолиятҳои башардӯстонаи он ситоиш карда буд. 

Шоҳзода Карим Оқохони чаҳорум, раҳбари исмилиёни ҷаҳон дар Тоҷикистон ҳудуди 200 ҳазор пайрав дорад, ки асосон аксари онҳо зодагони Вилояти Мухтори Кӯҳистони Бадахшон мебошанд.